Hasi da Tilos7Pasa Pala Txapelketa, eta ekaina bitartean, asteko lau egunetan jokatuko dira partiduak, 18:45etatik aurrera. Guztira 42 bikotek eman dute izena; mutiletan 33k eta nesketan 9k. Iaz arrakasta izan zuen, eta aurten are eta haundiagoa, txapelketa herrikoi honek. Iaz bezala, bereizgarri nagusi bat izango du txapelketak: zazpi koadrotik atzera bote egiten badu: pasa.
18 palista gehiago
Iaz baino 18 palista gehiago izango dira aurten; guztira, 84 lagun, astero-astero, txandan ariko direnak, eta San Joanak bitartean, ia 100 partidu jokatuko dituzte.
Arratsaldeko 18:45etan hasiko dira partiduak, hiru edo lau partidu jokatuko dira, bata bestearen atzetik, astelehenetik ostegunera.
10 talde egin dituzte antolatzaileek. Hasieran ligilla jokatuko dute, taldeko bikote guztiek, elkarren kontra. Maiatzaren 14an hasiko dira final zortzirenak; maiatzaren 28tik 31ra, final laurdenak; ekainaren 5 eta 7an, final erdiak; eta ekainaren 12an eta 15ean, finalak.
Hernaniko pala afizioa, begibistan
Aspaldiko urteetan ez zen hainbeste jendeko txapelketarik jokatzen Hernanin. Antolatzaileen helburua zen, ahalik eta jende gehienak parte hartzea, eta Tilosetari bueltatzea, bere betiko funtzioa: frontoiarena. Hernanin afizio haundia dagoela diote antolatzaileek; begibistakoa, bi urteetan txapelketa honek izan duen arrakasta ikusita.
Hernaniko Kronikak jarraipena egingo dio txapelketari, eta astero aterako ditu partiduak, eta emaitzak.
Asteko partiduak
Gaur, asteartea
18:45 Murua-Mendiola / Arantza-Eli
19:30 Esnal-Arregi / Gascon-Zabala
20:15 Zubelzu-Eizmendi / Txolo-Antxon
Bihar, asteazkena
18:45 Idoia-Iratxe / Eider-Larraitz
19:30 Zubimendi-Arluziaga / Jonkar-Nani
20:15 Txono-Urko / Dani-Arkaitz
Etzi, osteguna
18:45 Eba-Idurre / Legarreta-Sarobe
19:30 Leunda-Leunda / Magi-Txema
20:15 Donosti-Ioritz / Gaizka-Igor