Erraustegia gelditzeko erabakiaren kontrako iritziak plazaratzen ari dira hainbat politiko azken aldian, horien artean, Denis Itxaso PSE-EEko Donostiako zinegotzia. Horren harira datu eta azalpen batzuk eman dituzte sei kargu politiko eta eragilek. Tartean dira bi hernaniar: Ernesto Merino Aralarreko Gipuzkoako Koordinatzailea eta Julian Zapiain EHUko irakaslea. «Erraustegian dagoeneko miloika euro inbertitu direla diote eta gelditzeak oraindik ere kostu miloitsuagoak eragingo lituzkeela. Zehaztasun miresgarriz, 158 miloi eurotan kuantifikatu dute. Gipuzkoako Hondakinen Partzuergoko eta GHKko aurreko arduradunek (Carlos Ormazabal eta Denis Itxaso) arrakasta izugarri gisa saldu ziguten errausgailua. Baina finantzatzeko operazioa 21 urtekoa zen, BEI (195 miloi) eta Caixa/Banesto (69 miloi) bankuekin egindako kreditu kontratuetan egituratua. Interes tasak sekulakoak ziren, izugarri garestiak komisioak eta kostu haundiko kontratuak zeuden. Hori da, denon dirua konprometituz lortu zuten `pagotxa´», azaldu dute. Eta gaineratu dute: «Ez zituzten engainatu. Beraiek jakingo dute zerk bultzatu zituen horrelako zerbait sinatzera, baina badirudi, lortu nahi zutela, gerora atzera egitea ahalik eta garestiena izatea. Erraustegia martxan jartzea blindatu nahi zuten eta atzera ezina izatea. Gipuzkoako erakundeak, Partzuergoa eta Diputazioa, bankuen menpean utzi zituzten. Erraustegia bertan behera uzteak ekarriko lituzkeen ondorio apokaliptikoez aritu beharrean, Ormazabal eta Itxasok erantzukizuna bere gain hartu beharko lukete, erakutsi zuten arduragabekeriak eragin ditzakeen kalte ekonomikoen gainean».
«Erraustegia ez da beharrezkoa, ez bideragarria»
Gai hauei buruzko eztabaida arrazonalizatzeko garaia dela diote eta hondakinen inguruko planifikazioa berrezartzekoa; «hau da, %90 inguru birziklatzea lortzen duten sistemak ezartzeko garaia. Horrek, Usurbil, Hernani, Oiartzun eta Antzuolako esperientziak erakutsitakoa berriro agerian utziko baitu, hau da, erraustegia ez dela ez beharrezkoa, ez egokia, ezta bideragarria ere».