Espainiako Gazteen Neguko Txapelketa jokatu zen asteburuan Pontevedran, eta Itsaso Tolosa igerilari hernaniarrak emaitza ezin hobeak lortu zituen 100 eta 200 metro bizkar frogetan; azken honetan lortu zuen brontzezko domina. Ostiral goizean, 100 metro bizkar frogan lehiatu zen. 0 kaletik atera, eta bere marka pertsonala hiru segundutan hobetu zuen, 1 minutu 9 segundu eta 2 zentesimako denbora eginda. Marka honekin, zazpigarren postua eskuratu zuen igerilari hernaniarrak.
Geroz eta hobeto
Marka eta postuarekin animatuta, ilusioarekin ekin zion Tolosak hurrengo egunari. 200 bizkar frogan hartu zuen parte, eta kanporaketan, 2 minutu, 26 segundu eta 83 zentesimako denbora eginda sailkatu zen arratsaldeko finalerako. Emaitza ikaragarria izan zen, 6 segundutan hobetu baitzuen bere marka pertsonala. Arratsaldean B finala jokatu zuen Tolosak, eta goizeko denbora segundu batean hobetu zuen; hala 2 minutu, 25 segundu eta 95 zentesimako denbora eginda, brontzea lortu zuen.
Udaberriko Espainiako Open txapelketarako, sailkatuta
Egindako markarekin, Tolosak pasea lortu zuen Udaberriko Espainiako Opena jokatzeko. Opena martxoaren bukaeran jokatuko da, Malagan.