Bi urte pasa dira CAU Valentziako Sorribesek, igoera playoffeko azken segunduan, zorigaiztoko zigor kolpea sartu zuela. Iazko denboraldia ikusita, bazirudien Hernaniri kosta egingo zitzaiola berriz ere igoerako lehia horretan murgiltzea. Aurten ordea, hemen dira trikoloreak, datorren urtean ohorezko mailan jokatzeko inoiz baino gogo, indar eta ilusio gehiagorekin. Eta nola gainera. Ligan areriorik ez dute izan, eta jokatutako 14 partiduak irabazi dituzte. Horrez gain, bonusa ere lortu dute, 13 partiduetan. Playoffa bihar hasiko da, eguerdiko 13:00 etan, Madrilgo Complutense Unibertsitateko zelai Zentralean. Definitiboa bi aste barru jokatuko dute, martxoaren 18an; itzulerakoa izango da, Landaren.
Complutense Cisneros taldea, aurkari zaila
Denboraldiko zenbaki bikainak alde batera utzita, Hernanik igoera zelaiean irabazi beharko du. Eta aurrean ez du aurkari erraza izango, Complutense Cisneros taldea izango baitu.
Estatuko errugbiaren elitean urte askoan egondakoa da Cisneros, eta aukera paregabea izango da madrildarrentzat, Ohorezko Mailara bueltatzeko. 2007an jaitsi ziren Ohorezko B Mailara, eta ordurarte errugbiko maila gorenean 2 liga eta 4 kopa irabazitakoak dira.
Polidoriren esanetan, Hernanirekin antza haundia duen taldea da: «asko jokatzen duen taldea da, oinarri indartsua eta joko dinamikoa duena. Gure antza haundia dute. 3 edo 4 jokalari dituzte oso onak, diferentzia markatzen duten horietakoak».
Hala ere, Polidorik eta taldeko zenbait jokalarik, ez diote uko egiten Hernani faborito izatearen ideiari. Arkaitz Otegi jokalaria da horietako bat: «partidu guztiak irabazi ditugu, 13 bonus lortuta. Beste multzoko talderik onenak, CRC Madridek ere, ez du hori lortu, eta teorian, beraiek dira Ohorezko B Mailako talderik indartsuena. Beraz, bai, gu izan gaitezke kanporaketako faboritoak».
Cisnerosek eta Hernanik, baja garrantzitsuak
Cisnerosek 3 jokalari garrantzitsuren baja izango du biharkoan. Horietako 2, Angel Lopez eta Manu Saiz, Espainiako selekzioarekin kontzentratuta daude, eta Hong Kongeera joateko azken deialdian sartuko balira, ez lukete Landaren jokatuko.
Hernanik ere ez ditu jokalari guztiak prest izango. Aurrelarien artean pilatu zaizkie baja guztiak; Arkaitz Otegik (bigarren lerrokoa) eta David Pelazek (hirugarren lerrokoa) ezingo dute jokatu partidua, lesio ezberdinak medio. Hernaniko entrenatzaileen ustez, ziur aski, bigarren partiduan ere ezingo dute parte hartu.
Madrilen irabaztea, helburu
Polidori eta Seco entrenatzaileen arabera, kanporaketaren gakoa puntu gutxi jasotzea izango da. Gainera, biak oso konbentzituta daude taldea Madrilen irabazteko gai dela, eta Polidorirentzat, hori da biharko helburu nagusia: «helburua, zalantzarik gabe, Madrilen irabaztea da. Azken urteetako esperientziarekin konturatu gara, nahiz eta diferentzia txikiarekin galdu, ez dela nahikoa; itzulerakoan sorpresa asko gerta daitezke partiduan zehar...».
Secok dioenez, «puntu gutxi jasotzea ere izango da helburua. Aurten ez da horrenbeste nabaritu etxean edo etxetik kanpo jokatu dugun, erakutsi baitugu etxetik kanpo ere jokatu, konpetitu eta irabazteko gai garela».
Azken urteak kontuan izanda, Hernanik 4garren aldiz jokatuko du playoffa eta momentuz, hainbeste amestutako igoera ezin izan dute erdietsi. Aurten erakutsi duten maila emanez gero, urrezko aukera dute datorren urtean Ohorezko mailan jokatzeko. Bultza Hernani! yy