Astearteko Plenoan behin betiko onarpena eman zitzaien 2012ko aurrekontuei. Urtarrileko Plenoan behin behineko onarpena eman zitzaien eta aurrekontu haietan aurreikusten zen pertsonal gastuetan KPIa (IPC) igotzea. Luis Intxauspe alkateak herenegun azaldu zuen hori ezinezkoa dela Mariano Rajoy Espainiako Gobernuko presidenteak onartutako dekretuaren arabera eta moldaketa bat egin dutela. Diru kopuru hori beste kapitulu batean gordetzea proposatu zuten, Gobernu Taldearen borondatea baita, legez posible bada, igoera hori izatea. Aurrekontuak Gobernu Taldearen aldeko botoekin onartu ziren. Oposizioko alderdi guztiek kontra bozkatu zuten, aurreko bozketan bezala.
Animalien Ordenantza, lehengora Animalien Udal Ordenantzan moldaketa bat egitea ere onartu zen asteartean. Hain zuzen ere, ADNari zegokion puntua kendu da. Aurreko agintaldian erabaki zen txakurrek ADN proba egin behar zutela eta gai horrek herritarrengan sortutako eztabaida ikusita, Bilduk herritarrekin bilerak egitea erabaki zuen. Bilera horietan adostutakoa da Plenoan aurkeztutako testua. Andoni Amonarraiz EAJ-PNVko bozeramaileak proposamen batzuk egin zituen testua hobetu eta zalantzak argitzeko asmoz. Hainbat proposamen kontuan hartuta, bozketa egin zen eta aho batez onartu zen Ordenantzaren moldaketa. Txakurren gaiari lotuta, arazoak bi direla azaldu du alkateak: aske ibiltzea eta kakak. Herritarrekin egindako bileretan, eztabaidagai izan dituzte baita ere zakarrontzi gehiago jartzea eta txakurrentzako guneak jartzea edo ez, baina horiek ez direla Ordenantzak bildu beharreko gaiak gaineratu du. Bestalde, Animalien Ordenantzari lotuta, zigortzeko eskumena aldatzea onartu zen. Arau hauste larriak, berez, Plenoaren esku egon behar dute, baina Bilduk proposatu zuen Gobernu Batzordearen esku uztea, praktikotasunagatik. Alde bozkatu zuten Bilduk, EAJ-PNV eta H1!ek eta sozialistak abstenitu egin ziren.
Lau puntu gehiago Beste lau puntu ere onartu ziren. Esaterako, Martxoaren 8ko adierazpena, Bilduk aurkeztutakoa. Gobernu Taldearen aldeko bozkarekin onartu zen. EAJ-PNV eta H1ek kontra bozkatu zuten; sozialistak abstenitu egin ziren. Jeltzaleek mozio alternatiboa aurkeztu zuten eta ez zen onartu. Oposizioko alderdi guztiek alde bozkatu zuten eta Gobernu Taldeak kontra. Ume lapurtuen auziari lotutako mozioa ere aurkeztu zuten sozialistek eta aho batez onartu zen. Azken mozio horiek zabalago landuko dira larunbateko Kronikan. Horrez gain, Hondakinen Ordenantzari puntu bat gehitu zaio. Hondakin komertzial eta enpresetako hondakinak sistemaren barruan sartzea erabaki da, Bilduren botoekin. Gainerakoak abstenitu egin ziren. Bestalde, Udalak BIC Gipuzkoa Berrilan SA-n izango duen ordezkaritza ere izendatu zen. Bilduk proposatu zuen Aitor Miner izatea eta Kistiñe Lujanbio ordezkoa. Alde bozkatu zuen Bilduk eta beste guztiak abstenitu egin ziren.