Añarbeko Urak enpresaren ur sarean bi obra egingo dira aurten, aberien aurrean urik gabe ez geratzeko. Horietako obra bat Galarreta inguruan egingo da. Añarbeko ur sareak adar itxura du. Jatorria, Astigarragako Petritegiko EUTEn dago, hau da, biltegi burua dago bertan, eta lau adarren bidez, edateko ura Mankomunitatearen esparruko 23 biltegietara banatzen da. Adar horietako hasierako zatietan aberia garrantzitsu bat izanez gero, biltegi guztiak urik gabe geratuko lirateke. Horren aurrean, obra egitea erabaki du Añarbek. Sareari lauki itxura eman nahi dio eta sistemako adar nagusiak elkarrekin konektatuko dira. Sare mota honen abantaila honakoa da: aberia baten ondoren maniobra erraz eta azkarren bidez, zerbitzuak jarraitu dezake beste adar bat erabiliz.
1.125.000 euroko inbertsioa
Añarbeko Urak-ek jakinarazi duenez, lan honetan 1.125.000 euro inbertituko ditu. Galarretan lehenengo interkonexioa egingo da (I eta II adarren artekoa) eta 842.000 euroko aurrekontua izango du. Konexio tuberiaz gain, ponpaleku bat ere eraikiko da.
Helburu berdinarekin egingo dira II eta IV adarren arteko interkonexioa eta dagokion ponpalekua. Obra honen aurrekontua 283.000 eurokoa da.
Petritegiko ur biltegi
nagusiko konponketa obrak, bukatuta
Bukatu dira Astigarragako Petritegiko EUTEko (ur biltegi nagusia) konponketa obrak. 2008ko azaroaren 24ko goizaldean, Donostiako Bigarren Zinturoia egiteko obretan, luizi garrantzitsu bat gertatu zen Petritegiko EUTEaren ondoan. Lurra eusteko pareta bat hautsi egin zen eta ur sareko lau adarretatik hiru, guztiz edo partzialki moztuta geratu ziren. Kalte haundiak eragin zituen azpiegituran, baina Mankomunitatearen hamar udalerrietako 312.000 biztanlek ez zutela ur faltarik izan azaldu du Añarbek.
Konponketa lanek 1.263.000 euroko kostua izan dute. Bidegiren eta errepidea eraikitzen ari zen UTEaren aseguru-etxeek bere gain hartu dituzte kostuak. Obra honekin aldatu dira: 250 metro tuberi, 600 eta 1.200 mm-ko diametro artekoak; teleaginte-lineak; biltegi eta ponpalekuekin loturak; telefono-lineak; bideak; argiteria...
AÑARBEKO EGOERA
Urtegiaren egoera m3 %
2012-02-12an bildutako ur bolumena 32.880.726 88
Iaz egun berean bildutako ur bolumena 33.106.346 89
Prezipitazioak urtegian l/m2 Bataz besteko urtearekiko
Pasa berri den urtarrilean 266 129
Iazko urtarrilean 51 25
Prezipitazioak azken 24 hilabetetan l/m2 Bataz besteko urtearekiko
2011 ots.-2012 urt. 2.348 115
2010 ots.-2011 urt. 1.556 76