Gonbidatu berezia ekarriko du gaur Hernaniko Musika Bandak Hernanira. Joxe Mari Oiartzabalek zuzenduta, Musika Bandako kideek zazpi abesti joko dituzte Milagrosan, 13:00ean, eta gonbidatuta daude herritar guztiak. Joxe Mari Oiartzabal andoaindarrak kurrikulum luzea du musikari bezala, eta zuzendari bezala, eta ohore bat da beraz, gaur Hernanin izatea.
Donostiako Kontserbatorioan irakasle eta banda zuzendari
Andoaindarra da Oiartzabal. Tronpeta-jole bikaina, 1985etik irakasle lanetan aritua, Donostiako Goi Mailako Kontserbatorioan. Urte berean lortu zuen solista postua, Kontserbatorioko Banda Sinfonikoan; eta hurrengo urtean, tronpeta katedra, Kontserbatorioan hori ere.
Bandako zuzendari lanak ere ez zaizkio arrotzak. Hiru urtez egin zituen zuzendari lanak, Kontserbatorioko Banda Sinfonikoan. Beste hiru urtez Ikasleen Bandan, eta 1998-2000 bitartean, Ikasleen Orkesta Sinfonikoan.
ETBn ezaguna dute, programa asko eta askotan musika konponketak egiteagatik eta interprete lanak egina delako. Grabazio mordo bat eginak ditu Donostiako martxetako, kalderero edo inauterietarako.
Berak egindako abesti bat joko du Musika Bandak gaur; lehendabizikoa, hain zuzen: Artetxepea.
Egitaraua
Artetxepea J.M. Oiartzabal
La isla de las perlas P.Solozabal
El Barbero de Sevilla G.Rossini
Tribute to L.Armstrong J. Edmondson
Calypso D.Goyeneche
Waltz nº2 D.Shostakowich
Ordizia J.Franco