«Herri presio bidez eta jendea aktibatuta lortu behar dugu pausoak emanaraztea»

Helburua betetzean, hau da preso eta iheslari guztiak etxeratzean, Herrira desagertu egingo da. Lehenbailehen desagertzeko asmoz sortu da, baina zer espero duzue, nahi baino gehiago iraungo du, estatuak pausoak ematen hasiko dira…
I. Olano: Atera demokratiko baten bidean, Euskal He­rri mailan eman dira pausoak, baina estatuen aldetik ez. Nere ustez, momentua iri­tsiko da, pausoak eman behar­ko dituztena. Zerbait egin beharko dute eta horien artean, nik uste, presoak izango direla. Baina prest egon beharko dugu, posible baita batzuen gain ba­ka­rrik izatea eragina. Be­raiek jokatuko dute orain ar­te bezala, bi aterako dituzte eta beste bi beste puntaraino eramango dituzte, eta gainera, hori, herri berdineko jendearekin egingo dute... Kon­fusioa eta gure arteko talkak bilatuz. Beraiek badakite nola jokatu eta badakite oso ondo fun­tzionatzen diela horrek.

G. Gonzalez: Alde batek eman dituen pausoekin, gu­txienez, presoen gaineko presio batzuk desaktibatuta egon beharko lukete. Eta hala izango zela ematen zuen, baina azkenaldian badirudi hori frenatu egin dela. Eta hor sar­tzen gara gu: Herri presioa. Gaixo larriak kalean egon beharko lukete, parot doktrinak desaktibatuta egon beharko luke, presoek Euskal Herri­an, etxetik ger­tu egon beharko lukete… lehenengo neurri horiek de facto eman beharko lirateke gauden eszenatokian. Hori horrela uler­tzen du jende guztiak. Baina beraiek beren estrategiak dituzte eta aukeratu dute ez dela nahikoa. Horren aurrean, herriak ezetz dio. Gauza bat da jendea kartzelan egotea, baina bestea da biolentzia gehigarri bat aplikatzea. Gutxie­nez, hori desaktibatu behar da. Jendeak hori ulertzen du.

Jendea nekatu liteke, pausorik ez dela ematen ikusita?
G. Gonzalez: Gatazka kon­pon­du nahi du herri honek. Gatazka luzatzeak nekatu baino, kezka sortzen du. In­po­­tentzia… Gauzak okerrera baldin badoaz, jendeak edu­ki­ko du gauza gehiago egiteko gogoa, beste eran­tzun bat emateko gogoa. Nekatu bai­no, jendeak beste jarrera bat hartuko du. Nolabait, in­tsu­misoagoa izango da. Gaine­ra, urtarrilaren 7ko manifatik aurrera, politikarien deklarazioak aldatu egin dira. Sinistu egin behar dugu horrela presionatzeak eragina duela, iri­tzi publikoan eragiten duela.

I. Olano: Bilatu behar duguna da, beraientzat komenigarriagoa izan dadila pausoak ematea, ez ematea bai­no. Herri presio bidez eta jendea aktibatuta, lortu behar dugu aldaketa hori.