Juxtu-juxtu, brila baten aldeagatik irabazi dute Gipuzkoako Binakako Txapelketa Miguel Burugain eta Jose Ugalde Elur Txori elkarteko bolariek. «Eta hala izan behar du», dio Burugainek. Ugalde, berriz, nerbioek jota ibilia omen da, Burugainek eta gainerakoek tira ostean, bere esku baitzegoen irabaztea. «43 brila jo behar nituen irabazteko eta tripan halako min bat jarri zitzaidan...», dio. Eta ez gehiago, ez gutxiago; 43 brila bota zituen. Añorgan jokatu zen txapelketako azken tiraldia joan den igandean eta saio ona egin zuten bi txapeldunek. Bien artean 90 brila bota zituzten. Txapelketa osoan, berriz, 354 brila. Atzetik, bigarren postuan geratu ziren Jokin Izagirre eta Marcelino Agirre, 353 brilarekin. Azken tiraldian 89 brila bota zituzten horiek.
Azkenaurreko tiraldia, klabea
Binakako Txapelketan denera 28 bikotek hartu dute parte eta Elur Txoriko bikotea hasieratik nahiko ondo ibili bazen ere, Seguran jokatutako azkenaurreko tiraldia izan zen klabea. Sekulako tiraldia egin eta laugarren postutik aurrenekora pasa ziren. Orduko hartan 95 brila bota zituzten bien artean: 47 Burugainek eta 48 Ugaldek. 2006an ere, txapeldun, brila bategatik Burugain eta Ugaldek gazte gaztetatik jokatu izan dute bolan, 50 urtetik gora badira hasi zirela eta elkarrekin 30 bat urte daramazkite bola bikote bezala, «matrimonio bat bezala», diote. Elkarrekin ederki moldatzen dira, 2006an ere txapeldun izanak dira biak, binakako txapelketan. «Orduan ere brila bategatik irabazi genuen eta bigarren geratu ziren Miner aita-semeak», azaldu du Burugainek. Bi jokalariak bakarrik ez, Elur Txori taldea ere emaitza txukunak lortutakoa da. Taldekako 10 bat txapela irabaziak dituela azpimarratu dute.
Lehendakari Saria, martxotik aurrera
Martxoaren 4tik aurrera, Lehendakari Saria hasiko dira jokatzen, banaka. Zerainen izango da lehenengo tiraldia eta bigarrena, Ereñotzun. Apirila hasierara arte iraungo du txapelketak. Txapeldunek argi dute, oraingoan ere, txapelketa guztietara bezala, irabaztera joango direla.
Gipuzkoako Binakako Txapelketa - Hernaniarren sailkapena:
1.- Jose Ugalde eta Miguel Burugain (Elur Txori).................354 brila
11.- Miguel Arrozpide eta Antonio Goenaga (CD Hernani)..............330 brila
14.- Antonio Miner eta Ibon Miner (Ur Mia)............322 brila
20.- Nikolas Osaba eta Aurelio Santos (Elur Txori)......288 brila
Erregularitatea (orain arteko tiraldiak):
1.- Miguel Burugain (Elur Txori).................276 brila
15.- Antonio Goenaga (Elur Txori).................256 brila
19.- Ibon Miner (Ur Mia)......................254 brila
20.- Miguel Arrozpide (CD Hernani)..............252 brila
22.- Jose Ugalde (Elur Txori).................251 brila
29.- Nikolas Osaba (Elur Txori).................239 brila
32.- Antonio Miner (Ur Mia)......................236 brila
39.- Aurelio Santos (Elur Txori).................216 brila