Aintzina euskal folk taldeak disko berria kaleratu du eta atzo aurkeztu zuten Donostiako Koldo Mitxelena Kulturgunean. Lan berri honek Kosinatik kanberala izena du eta 14 abesti bildu dituzte moldaketa aberats eta orijinalez baliatuta. Hernaniko Aztarna ekoizpen etxearekin argitaratu dute.
Aintzinako istorioak
Aintzina taldea helburu garbi batekin sortu zen euskal musika tradizionalaren barruan: «jendeari ezagutaraztea inoiz grabatu ez diren aspaldiko bitxikeria batzuk». Hala, aintzinako istorioak narratzen dituzten testuak eta musika elkartzen dituzte, doinu herrikoietan oinarrituta. Aurreneko lana, Suitian (2009) izan zen, eta orduan bezala, azken lan honek ere helburu bera bilatzen du.
Eskarmentu haundiko laukotea
Eskarmentu haundiko eta Hernanirekin lotura haundia duten lau musikarik osatzen dute Aintzina taldea: Alan Griffin (haizezko instrumentuak, muxukitarrak), Juanjo Otxandorena Pepe (bouzouki, ahotsa), Arkaitz Miner (arrabita, mandolina, zapatak) eta Zigor Sagarna (ahotsa, baxua, panderoa). Besteak beste, hilabeteko azken ostegunetan Kixkalen jotzen duen Turlach taldeko kideak dira, lehenengo hirurak. Eta lau musikariak honako taldeetan aritu izan dira: Alboka, Oreka TX, Izotz, Arrabots, Ruper Ordorika, Laket, Esne Beltza...