langabetu kopuruak gora jarraitzen du Hernanin, Hego Euskal Herrian bezala. 2011ko azken hiruhilekoko datuak aztertuta, ikus daiteke paroak gora egin duela; abenduan, irailean baino 11 langabetu gehiago zeuden Hernanin.
Joera hori hilabetez hilabete aztertuz gero ordea, ikus daiteke azaroa izan dela azken hilabeteetatik gogorrena. Urrian 1.178 langabetu zeuden Hernanin; azaroan, 1.187; eta abenduan, 1.181.
2010eko datuekin alderatuz gero, langabetu kopuruak gora egin du nabarmen. 2010a 1.122 langabeturekin bukatu zuen Hernanik urtea, 2010eko abenduan baino 59 langabetu gutxiagorekin.
Gipuzkoan ere, langabetu gehiago
Hernanin bezala, Gipuzkoan ere gora egin du langabeziak irailetik. Abenduaren 31n, 41.130 pertsona zeuden lanik gabe Gipuzkoan, irailean baino 887 gehiago.
2010eko datuekin alderatuz gero ere, tendentzia berdina da. 2010a 39.449 langabeturekin bukatu zuen Gipuzkoak, eta 2011 41.130ekin; hau da, 1.181 gehiagorekin.
Hego Euskal Herrian, 188.012 langabetu
2011ko azken sei hilabeteetatik haunditzen ari da krisi ekonomikoaren eragina Hego Euskal Herrian. 2011ko abenduaren 31ko datuei erreparatuz gero, Hego Euskal Herrian 188.012 pertsona zeuden lanik gabe.
Gainerako Autonomia Erkidegoetan bezala, Hego Euskal Herrian ere, zerbitzuetako sektorea da kaltetuena, 88.247 langabeturekin. Atzetik, industriako sektorea dago, 23.346 langabeturekin.
Hernanin, Zerbitzuetan, 748 langabetu, Industriaren hirukoitza
Zerbitzuetako sektorea da krisia gehien sufritzen ari dena Hernanin ere. Abenduan zeuden 1.181 langabetuetatik, ia hiru laurdenak sektore honetakoak ziren: 748 pertsona.
Atzetik, bigarren sektore kaltetuena industriakoa izan zen Hernanin, 229 langabeturekin; eta segidan zeuden eraikuntza 127 gelditurekin; 63 ziren lehendik lanik eduki gabekoak; eta 14 nekazaritza arlokoak.
2010eko datuekin alderatuz gero, sektore ia guztietan egin zuen langabeziak gora; gehien, zerbitzuetan. 2010ean, 700 langabetu zeuden zerbitzuetako sektorean, eta 2011n 48 gehiago, hau da, 748. Eraikuntzan eta nekazaritzan 2010ean baino 4 langabetu gehiago zeuden 2011ko abenduan, eta aurretik lanik izan gabeak 24 gehiago izan ziren 2011n.
Industriaren sektorea izan zen langabetu kopuruak behera egin zuen bakarra, 2010eko datuekin konparatuta. 2010ean 240 ziren, eta 2011n 229.
Emakume langabetu gehiago, Hernanin
Langabezia sexua kontutan hartuta aztertuz gero, emakumeek gehiago pairatzen dute gizonek baino. Hernaniren kasuan, 2011ko abenduaren 31n 619 emakume zeuden lanik gabe Hernanin. Gizon langabetuak berriz, 608 ziren, hau da, 11 gutxiago. Krisiaren eraginez, gizonezkoen eta emakumezkoen arteko langabetu kopurua murriztu dela ere antzeman daiteke. 2010etik 2011ra ere, antzeman daiteke murrizketa hori: 2010ean 584 gizon langabetu zeuden, 2011n baino 46 gehiago.
Langabetuen adin tarteari erreparatuz gero, bi kasuetan, 25-44 urte bitartekoak dira langabezia gehien sufritzen dutenak: gizonezko langabetuak 271 ziren 2011ko abenduan, eta emakumezkoak 293. Oso gertutik, 45 urtetik gorako herritarrak dira langabezia gehien pairatzen dutenak: gizonezkoak 225 eta emakumezkoak 280.
2011ko azkeneko hiruhilekoan, irailean baino 41 lan kontratu gutxiago
2011 bukaeran paroak gora egin zuen moduan, lan kontratuek behera egin zuten. Azkeneko hiruhilekoan, irailean baino 41 lan kontratu gutxiago egin zitzaizkien Hernaniko bizilagunei. Hilabeteka analizatuz gero, azaroa izan zen hilabeterik oparoena hernaniarrentzat, 498 lan kontratu berri egin baitzizkieten. Urriko eta abenduko datuak berriz, azken aldiko okerrenetakoak izan ziren, 400 izan baitziren kontratatutako pertsonak.
Kontratazioa sektoreka landuz gero, zerbitzuetan egin ziren lan kontratu gehien 2011 bukaeran: urrian, 273; azaroan, 335 eta abenduan 239. Langabeziarekin gertatzen den bezala, kasu honetan ere, bigarren sektore nagusia industriarena da. Industriarako 92 hernaniar kontratatu ziren 2011ko urrian; 110 azaroan eta 92 abenduan.