Euskal preso eta iheslarien alde lan egingo duen Herrira mugimendua aurkeztu zuten igandean, Donostiako Kursaalean, eta ostiralean, Hernanin zentratzen den mugimenduaren berri izateko aukera izango da. Izan ere, Hernaniko Herrira aurkeztuko dute 18:30etan, Biterin. Aurkezpenaren berri emanez, hala azaldu diote Kronikari: «Euskal Herriko preso eta iheslarien egoera arintzeko eta haiei dagozkien eskubideak aldarrikatzeko, zenbait herritarrek Hernaniko Herrira bilgunea sortzea pentsatu dugu».
Herritar guztiei zuzendua
Gaineratu dute, bilguneak mugimendu erabat irekia izan nahi duela eta espero dutela ikuspuntu desberdinetako jendez osatutako lan taldea izatea. Eta gaineratu dute, lanak aurrera eramateko, ezinbestekoa ikusten dutela taldeak oinarrizko egitura eta antolaketa izatea. Hori lortzeko asmoz, herritar guztiei zuzendua dago gonbidapena.
«Egoera lazgarri hau bukatzeko aukerari, ezin diogu uko egin»
Mugimenduko kideek azpimarratu dute une garrantzitsua dela eta ezin zaiola uko egin: «Preso eta iheslarien eskubideen aldeko borroka honetan une garrantzitsua bizi dugu, eta gure herri honek jasaten duen egoera lazgarri hau bukatzeko aukerari, ezin diogu uko egin».
Ideiak, proposamenak, iritziak... jasotzeko lekua
Bilgunetik argi utzi dute guztion partaidetza behar dela, «bakoitzak ahal edo nahi duen konpromisoa azalduz». «Sortzen ari garen bilgune hau zuen ideiak, proposamenak, iradokizunak eta iritziak jasotzeko leku egokia bihurtu nahi da. Eta hau aurrera eramateko, Hernaniko bilgune honetara hurbildu zaitezten eskatzen dizuegu. Denok dugu lekua bilgunean! Ezin dugu injustizia nagusitzen utzi!».