Gobernu Taldeak aurkeztutako Aurrekontuen aurka bozkatu zuten oposizioko hiru alderdiek, hau da, PSE-EE, EAJ-PNV eta Hamaikabatek, eta Osoko Zuzenketak aurkeztu zituzten, bakoitzak berea. Batez ere, hiru alderdiak ez daude ados hondakinen gestiorako aurreikusi den diru partidarekin, eta EAJ-PNV eta H1! pertsonalerako aurreikusi denarekin ere ez.
Sozialistek eztabaidagai, Zerbitzu Sozialak, Zaharren Egoitza, lan formazioa eta Atez Atekoa
Sozialistek diote aurkeztutako Aurrekontu horiek ez dutela ezer berririk biltzen eta gobernu berria mugatu dela aurrekoaren berdina egitera. Horrez gain, azaldu dute Alkateak dioela ez dutela murrizketarik egingo Zerbitzu Sozialetan, baina hori ez dela horrela. «Aportazio kopurua mantentzearen alde egin da, kontuan izan gabe demanda gehiago dagoela. Egoera ekonomiko honetan gero eta herritar gehiago dira Zerbitzu Sozialen beharra dutenak».
Zaharren Egoitzaren egoerarekin ere ez daude konforme. «Ezker Abertzaleak 4 urte pasa ditu Diputazioarekin tratuan, dagokion konpetentzia bere esku hartu dezan, eta dirudienez, orain arteko guztiak ez du ezertarako balio izan. Gobernu Talde berria hutsetik hasi da eta Hernanik beste urte betez gastu horien kargu egin beharko du eta milioi bat euro baino gehiagoko gastua da».
Lan munduan sartzeko, Udalak eskaintzen dituen ikastaroak ere eztabaidagai dituzte. «Gobernu Talde honek, nahiz eta esan, gauzak modu berri batean egin nahi dituela, orain dela 20 urtetatik eskaintzen diren ikastaro berdinak mantentzen ditu».
Hondakinen gestioari dagokionean, honakoa azaldu dute: «Atez Ateko hainbat gastuetarako aurreikusten den diru partida 100.000 eurokoa da. Horri gehitu behar zaio Garbitania enpresak egiten duen bilketa zerbitzuaren kostua milioi bat eta erdi eurokoa dela urtero. Gainera, Udala hainbat gasturen kargu egiten ari da berez enpresa horrenak direnak: bilketarako kamioiaren alokairua, gasoila, kamioiak garbitzea... Aspaldi eskatu genuen Garbitaniako datu ekonomikoen dokumentazioa eta oraindik ez digute eman».
EAJ-PNV: «5 edo 6 kontenedoreen sistemarekin, 400.000 euro aurreztu»
Jeltzaleek 6 arrazoi nagusi eman dituzte Bilduk aurkeztutako Aurrekontuak ez onartzeko. Horien artean daude, hondakinen gestioari dagokiona. Garbitania elkartera 1.533.000 euro (2011n baino 129.000 euro gehiago) bideratuko direla diote, eta horrez gain, Atez Atekoan 100.000 euroko inbertsioa aurreikusten dela. Horren aurrean, 5 edo 6 kontenedoretako sistemaren alde egitea eskatzen dute: «400.000 euro aurreztuko genituzke».
«Gobernu Taldeko aholkularientzako eta nahieran aukeratutako langileentzako partida mantendu egiten da Aurrekontu hauetan. Partida horiek desagertzea nahi dugu eta funtzionarioekin bakarrik lan egin dadila», ere eskatu dute.
Horrez gain, nahi dute kooperaziora zuzentzen den diruaren %25a, munduan zehar proiekturen bat aurrera daramaten hernaniarrei ematea eta erabiltzen den sistema, zuzeneko konzesioa izatea.
Azkenik, soldaten inguruko erabakiarekin ez datoz bat: «exigitzen dugu moldatu dadila, Gobernu Taldeak egin duen proposamena soldatak igotzeari dagokionean, funtzionarioen sektore bat diskriminatzen baitu eta bi mailatako langileak sortzen baititu».
Hamaikabat: «Ulertezina da pertsonalean iaz baino %6,36 gehiago gastatzea»
Hamaikabat alderdiaren esanetan, «aurreztea da gakoa eta Gobernu Taldeak aurkeztutako 2012ko Aurrekontuak ez dira aurreztean oinarritzen. Udal Gobernuak ez ditu lanak behar bezala egin eta axolagabekeriaz ari da. Ulertezina da pertsonalean iaz baino %6,36 gehiago gastatzea, 478.374 euro gehiago».
Gainerako alderdiek bezala, Hondakinen gestiorako partida ere izan du hizketagai Hamaikabatek: «Iaz, Atez Atekoarekin 2.000.000 euro gastatu genuen; Aurrekontu hauetan berriz, 1.850.000 euro izango direla aurreikusten da. Datu hauek ez ditugu sinesten eta jarraipen zorrotza egingo dugu», dio. Horrez gain, azaldu du, Garbitanian oskurantismoa dela nagusi: «Hernaniko Udalak %49a duen enpresa publiko honen datuak eta prozedimenduak behin eta berriz eskatu ditugu eta oraindik zain gaude»