Huarte eta Zaramaga taldeak izango dira gaur, aurrez aurre, Kiroldegiko pelotalekuan jokatuko den kanporaketan. Berria Txapelketa ospetsua final zortzirenetan da, eta Nafarroako eta Arabako bi taldeek, hurrengo faserako pasea lortzea izango dute helburu.
Kadetetan, Huarteko bikotea faborito
Kadete mailan, Huarte taldeko Larunbe eta Sarasa egungo Nafarroako txapeldunak dira, eta beraz, partidua irabazteko faboritoak. Aurrean, Zaramagako Diaz de Heredia eta Kandela izango dituzte.
Seniorretan, Zaramagako bikotea, mailako onena
Zaramagako bikotea, Loban eta Tabar, dira seniorretako partidua irabazteko faboritoak. Maila honetako bikote onenetakoak dira eta gaur, Mikel Rafael eta Perezen kontra erakutsi beharko dute euren abilezia.
Jubeniletan, desenpatea
Aipatutako bi partiduak espero bezala bukatzen badira, jubeniletakoak markatuko du desenpatea. Kasu honetan, Huarteko atzelaria, Andueza, mailako atzelaririk onenetakoa da; baina era berean, Zaramagako aurrelaria, Larrañaga, aurrelari onenetakoa. Beraz, partidu ikusgarria izatea espero da. Anduezak Zamora izango du bikote; eta Larrañagak Agirre.
Momentuko pelotari
onenak biltzen dituen txapelketa
Berria txapelketa Euskal Herriko talde eta pelotari onenek jokatzen dute, eta beraz, gaur kiroldegiko pelotalekura gerturatzen direnek partidu bikainez gozatzeko aukera izango dute. Kanporaketa goizeko 11:00etan hasiko da.