Inauteriei aurre hartuta, iragartzeko asmoarekin, Iñude eta Artzaien konpartsa aterako da datorren igandean, Hernanin. Urumea ikastolako 170 neska-mutilek egingo dute kale buelta, eguerdiko 12:00etatik aurrera. Hemeretzigarren edizioa izango da aurtengoa, eta urteroko moduan, herritar ugari erakartzea espero dute: «urteen poderioz, Iñude eta Artzaien arrakastak herriko mugak gainditu ditu, eta badira inguruko herrietatik, ikuskizuna ikustera gerturatzen direnak».
Bakoitzak bere ofizioa
Globo, piruleta eta barkilo saltzaileak, umezainak, alkatea, udal-idazkaria, sendagileak, erizainak, zapata garbitzaileak, argazkilariak... Konpartsan aterako den neska-mutil bakoitzak ondo zehaztuta du bere ofizioa.
Ekitaldi nagusian hartzen du bakoitzak bere izaera, eta urteroko moduan, Gudarien plazan izango da (eguraldi txarra egingo balu, Atsegindegin). Bertan, Iñudeek dakarzkiten haurrek txertoa hartuko dute, eta ondoren, Udaleko agintariei aurkeztuko dizkiete, bere izena erregistroan idatzia gera dadin. Azkenik, arin-arina dantzatuko dute, eta ikastolara itzuliko dira.
Guztira, 48 dantzarik hartuko dute parte ekitaldian, eta beste horrenbestek, danbor hotsez lagunduko dute ikuskizuna. Gainera, musikarien laguntza izango dute.
Konpartsaren ibilbidea
Konpartsa Gay Murretik aterako da, eta buelta ondorengo izango da: Sandiusterri, Elkano, Plaza, Kardaberaz, Plaza Berri, Kale Nagusia, Zinkoenea, Txirrita, Izpizua, Urbieta, Kale Nagusia, Plaza, Sandiusterri eta Gay Mur.