Kriseilu, lapiko eta pertzak eskuan dituztela, Hernaniko kaleetan barrena ibiliko dira gaur Hungariatik datozen kaldereroak. Inauteriak iragartzeko asmoarekin etorriko dira, azken mende laurdenean bezala, eta lapiku edo beste tresnarik konpondu nahi duenak, beraiei eman besterik ez du.
Ibilbide berria, aurten
Herniarrekin ondo moldatzen dira, hartu-eman berezia izan dute beti, eta aurten ere, hitzordua jarri dute, kale buelta elkarrekin egiteko. Elur Txori elkartetik aterako dira, gaueko 21:00etan, eta azalduko diren ehundaka herritarrei jakinarazi diete, komeni dela euren janzkerara egokituta joatea: kolorezko jantziak, trapuak buruan eta soinean, urre koloreko koilare, pultsera, eraztun eta belarritakoak... eta nola ez, herritarrak esnatzeko kriseilu, lapiko eta pertzak. Ibilbidea ere, berria dute: Elur Txoritik Sandiusterri kalera joango dira, eta handik Kaxkora; Kardaberaz jaitsi eta Kale Nagusia igoko dute, eta azken geltokia, Plaza izango da.
ZEIN EDERRA
Zein ederra, zein xarmanta
Hernaniko inauteria!
herri jator hernaniarra
agurtuz dugu atsegina.
Hungariako kaldereroak gara
etorriz Hernanira
laister Momok aginduko digu
nahiz eguna nahiz eta gaua
Inauteri alaiaren iragarle gu gara
Ai atsegina eta algara
Aizak, jozak, jozak
Aizak, jozak, jozak
ADISKIDE MAITEOK
Adiskide maiteok
ekin bai lanari
Kriseilu, lapiko, pertzak
burruntzali eta eltzeak
aise konpontzen gu gara
merke eta trebeak.
Eta lana muxu truke
pozik egingo genuke
hor beheko neska polittek
eskatzen badigute.
Hernaniar neska ponpoxak
ez al dugu beste lanik?
aurtengoz badugu aski
eta goazen aurrera.