Basosoro baserriko behi esnea erosteko makinaren ondoan, beste makina batekin egingo dute topo orain, herritarrek. Izan ere, atzotik, martxan dago baserriko esneki ekologikoak saltzen dituen makina. Bertan, esku-eskura daude yogur naturalak, behi eta ardi gaztak, mamia egiteko ardi esne gordina, gatzaia... Inaugurazioa atzo goizean izan zen eta bertan izan ziren, Luis Intxauspe Hernaniko alkatea, Ainhoa Amundarain Behemendiko gerentea eta Ramon Mugertza eta Fermin Murua, baserritarrak, hau da, produktuen ekoizleak (Gregorio Zuaznabar, hirugarren baserritarra falta zen). Intxauspek azaldu zuen horrelako iniziatibak oso garrantzitsuak direla, bi zentzutan: «Nekazaritza ekologikoa oso garrantzitsua da, bizitza eredu honetan, gure elikadura, osasuna zaintzeko bidea ematen baitu. Eta horrelako makinek aukera ematen dute erosle eta ekoizlearen arteko salmenta zuzena izateko; bitartekorik gabe». Alkateak gaineratu zuen, espero duela esne makinak bezalako arrakasta izatea eta pixkanaka produktu gehiago jartzea.
Kalitatea, ziurtatua
Ainhoa Amundarain Behemendiko gerenteak ere, zuzeneko salmentaren garrantzia aipatu zuen: «halako makinekin, Behemendi ahalegintzen da baserritarrei salmenta zuzena izateko aukera ematen, ahalik eta bitartekari gutxien izanda». Horrez gain, azpimarratu zuen, produktu horiek ematen dituzten ardi eta behiak ongarri kimikorik gabe elikatuak direla eta produktu horietan kalitatea ziurtatua dagoela.
Baserritarrak, aukera
berriarekin pozik
Ramon Mugertza eta Fermin Murua baserritarrak pozik azaldu ziren aurkezpenean, euren produktuak saltzeko aukera bat gehiago delako. Mugertza artzaia da, hernaniarra, Telleri-Zahar baserrikoa eta ardi esnea eta ardi gazta ekartzen ditu. Murua altzotarra da, Berakoetxe baserrikoa eta Anoetako Sarobe baserriko Gregorio Zuaznabarrekin, Behieko Sabekoetxea proiektua jarri du martxan. Euren behi esnearekin egindako yogurrak eta gaztak ekartzen dituzte.
Atzo, herritar asko izan ziren makina berria ezagutzera gerturatu zirenak eta bide batez, salgai dauden produktuak probatzeko aukera ere izan zuten.
Produktuak eta prezioak
1/4 ardi gazta (Idiazabal)................. 7,50 euro
1/4 behi gazta........... 3,60 euro
1/2 behi gazta................ 7 euro
130gr yogur natural... 0,65 euro
400gr yogur natural... 1,60 euro
Ardi esne gordina....... 2,80 euro
Gatzaia........................... 3euro