Hernaniko paletarien maila Euskal Herriko onenetakoa da, eta hori egiaztatzeko, gaur Anoetan jokatuko diren finalei erreparatu besterik ez dago. Jubeniletan, finala jokatuko duten bi bikoteak hernaniarrak dira; eta seniorretan, Suberriren kontra jokatuko duena ere bai. Partiduak arratsaldeko 17:00etan hasiko dira, Anoetako pelotalekuan. Jubeniletan, Irazustabarrena eta Huizik jokatuko dute Pagola eta Arrietaren kontra. Edonork irabazi dezake, bi bikoteek maila antzekoa baitute; beraz, partidua oso berdindua izatea espero da. Seniorretako partiduan berriz, Manzisidor eta Semper dira, finalera iritsi direnak eta Suberri izango dute aurrean. Gipuzkoako txapelketako finalean elkarren kontra jokatu zuten baita ere, eta orduan bezala, gaurkoan ere Suberriko bikotea da irabazteko faboritoa.
Murgiondo eta Leonet, Gipuzkoako finalerdian
Hernaniko beste bi pelotarik ere hitzordu garrantzitsua dute gaur. Gipuzkoako finalerdiak jokatuko dira, trinketekoak, Donostiako Gaska pelotalekuan, 15:00etan.
Aurreneko partiduan, Aritz Murgiondok jokatuko du Urnietako Loitegiren kontra. Partidu zaila espero da, Loitegi baita maila honetan, momentuan dagoen pelotaririk onena.
Bigarren partidua berriz, Jon Leonetek jokatuko du, Urnietako Lizasoren kontra. Kasu honetan, partidua oso berdindua izatea espero da. Leonet maila onean ari da azken aldian, eta sakearekin asmatzen badu, partidua irabazteko aukera izango du.