Asteartetik aurrera, mamia egiteko ardi esnea, yogurrak, ardi gazta eta behi gazta erosteko makina izango da Hernanin. Behemendi Landa Garapeneko Elkarteak jakinarazi duenez, baserriko esneki ekologikoen makina berri hori Urbieta kalean jarriko dute, orain dagoen Basosoroko esne makinaren ondoan, hau da, Atsegindegi parean. Inaugurazioa asteartean izango da, goizeko 11:00etan. Bertan izango dira, Luis Intxauspe Hernaniko alkatea, Behemendiko Gerentea eta esnekiak jarriko dituzten baserritarrak.
Yogurra, mamia eta gazta probatzeko aukera
Makina berria inauguratzen dutenean, hau da, asteartean, hurbiltzen den guztiak yogurra, mamia eta gazta probatzeko aukera izango du. Arduradunek dei egiten diete herritarrei bertaratzeko.
Hernaniko Telleri-Zahar baserriko produktuak, besteak beste
Makinan egongo diren esnekiak hiru baserritatik ekarriko dituzte: Hernaniko Telleri-Zahar (Ramon Mugertza), Altzoko Berakoetxe (Fermin Murua) eta Anoetako Sarobe (Gregorio Zuaznabar).