Kirol arloan lan egiten duten talde edo elkarteek Udalaren diru laguntzak jaso ahal izateko, orain dute aukera, eskaera egiteko. Eskaera egiteko epea atzo zabaldu zen eta 30 egun naturaleko tartea izango da; hau da, otsailaren 16ra bitarte egin ahal izango da eskaera. Eskaera orria eskuratzeko edo aurkezteko, Kiroldegira jo daiteke.
Oinarri bereziak
Gobernu Batzarrak, joan den ostiralean erabaki zuen, kirol jardueretarako diru laguntzak emateko oinarri bereziak onartzea. Oinarri horien arabera, diru laguntza horiek, Hernanin kokatutako irabazi asmorik ez duten kirol klubei eta entitateei zuzenduta daude. Hernaniko Udalaren Kirol programaren helburuekin bat datozen 2011ko hainbat kirol programa eta jarduera antolatzeagatik emango dira. Kasu zehatzetan, Hernanitik kanpo kokatutako entitateek ere izango dute diru laguntza eskuratzeko aukera. Diru laguntzetarako bideratutako kreditua 28.953 eurokoa da eta 2012ko aurrekontuko partidari dagokio.
Aurkeztu beharreko dokumentazioa
Eskaera egiteko, alde batetik, eskaera orria bete behar da. Orri hori Udalaren bulegoetan lortu daiteke, astelehenetik ostiralera, 09:00etatik 13:30etara. Bestetik, aurkeztu behar dira: estatutuak (duela gutxi eratutakoa bada), Identifikazio Fiskaleko Kodearen fotokopia, Udal Erregistroan izena emanda dagoela ziurtatzen duen agiria, entitatearen curriculuma, egindako diru laguntza eskaeren deklarazioa eta kontuaren titulartasuna ziurtatzen duen dokumentua. Eskatzaileak aurkeztutako dokumentazioa osorik ez badago edo baldintzak ez badira betetzen, zuzenketak egiteko 10 egun baliodun izango dira 7 baremoren arabera Diru laguntza, alde batetik, finkoa izango da elkarte guztientzat: 600 euro (betiere aurrekontu osoaren %40a gainditzen ez badu). Bestetik, 7 baremoren arabera banatuko dute: zein kategoria edo maila lantzen diren, kirolari kopurua, entrenatzaileen prestakuntza maila, jarduera puntualak diren ala urte guztikoak, ezintasun fisikoa eta psikikoren bat dutenei zuzendutako jarduerak diren, edo emakumezkoen eta gizonezkoen arteko berdintasuna bultzatzen den.
Ebazpena jakiteko, 3 hilabete gehienez
Ebazpenak emateko eta jakinarazteko gehieneko epea 3 hilabetekoa izango da, eskaerak aurkezteko epea amaitu eta hurrengo egunetik hasita.