«Batez ere emakumeak marraztu ditut eta erakutsi nahi izan dut Congon gertatzen ari dena: biolazioak, hilketak... Hori da bizi dugun egoera, baina horretaz ez da hitz egiten. Coltana, Congon dugun mineral bat da, mobilek, ordenadoreek, telebistek... darabiltena eta horren eraginez da guztia. 1996tik, 5 milioi hildako izan dira», dio Papytsho Mafolo Pongo Congoko artistak. Eta egoera horren berri emateko, oleo erakusketa jarri du Biterin, Bilili Arte Afrikarra Promozionatzeko Elkartearen bidez.
Kolore biziak
Artelanetan, emakumeen irudiez gain, nagusi dira kolore biziak, laranja eta horia, esaterako. Mafolo Pongok dio kolore horiek erabili dituela, hori delako beraiek barruan daramatena. «Kolore biziek alaitasuna irudikatzen dute. Guri dantzatzea eta kantatzea gustatzen zaigu, mina ezkutatzeko, eta kolore horiek horixe erakusten dute».
Denera, 17 artelan daude ikusgai, horietako asko, tamaina haundikoak.
20 urteko ibilbidea
Mafolo Pongo Congokoa da, baina 6 urte daramatza Gasteizen bizitzen. Gaztetatik, 14 urtetatik dabil pintatzen, egun 34 urte ditu, eta hori du ogibidea. Orain urtebete, Bilili elkartea jarri zuen martxan beste bi lagunekin eta Afrikako artea bultzatzea dute asmoa. Hernanikoaz gain, badituzte erakusketa gehiago eskuartean; martxoa inguruan Gasteizen, esaterako.
Biteriko erakusketa, urtarrilaren 23ra arte egongo da ikusgai, 18:00etatik 20:00etara, eta egilea bera bertan izango da, egunero.