«Pediatrak esandakoa gezurra da, niri ez zidaten haurra ikusten utzi»

Urtebete baino gehiago da haur lapurtuen auzia pil-pi­lean dela. Hernaniko Kro­nikak joan den urteko maia­tzean Karmele Mujika herna­niarraren kasua kontatu zuen, eta aste honetan, nobedadeak izan dira. 1978ko urrian izan zuen Karmele Mujikak umea, eta jaio eta 25 egunetara, hil egin zela esan zioten. Haur la­purtuen kasuak entzun zi­tuenean, berea ere, lapurtua izan zenaren susmoa izan zuen. Hala, aurreneko pau­suak eman zituen: bere, eta umearen historial klinikoa eskatu, ADN froga egin, eta gainontzeko kasuekin batera, elkartearen bidez, denuntzia jarri Estatuko Fiskaltza Na­gusian.

Gipuzkoako fiskaltza, kasua aztertzen
Estatuko Fiskaltza Nagusiak autonomikoetara desbideratu zituen jasotako kasu guz­tiak; eta hauek, probin­tziale­tara. Gauzak horrela, Gipuzkoako Fiskaltzaren esku geratu zen kasuen azterketa, tartean, Karmele Mujikarena. Handik aurrera hasi zen Gipuzkoako Fiskaltza Kar­meleren kasuan pausuak ematen. Lehendabizi, Gi­puzkoako Auzitegiari kasua aztertzeko eskatu zion, eta ondoren, probak biltzen hasi zen, tartean, Karmele Mu­jikaren eta hildako umearen historial klinikoa. Kasu ho­netan ere ez zen azaldu. Gauzak horrela, familiak umea jaio eta hil zenaren bi proba besterik ez zituzten; bat, erregistrokoa, eta bestea, Familia liburukoa.

Deklarazioak egin baino hiru egun lehenago azaldu da historial klinikoa
Ostegunean Karmele Muji­karen kasuan zerikusia izan zuten bi pertsonek deklaratu zuten Gipuzkaoko Auzi­te­gian. Eguna iritsi aurretik ordea, nobedade berri ba­te­kin deitu zioten Kar­meleren abokatuari. Hainbestetan desagertua zegoela esan zioten historial klinikoa agertu zen. Gauzak horrela, osteguna, bi deklarazioen eguna iritsi zen. Batetik, haur­du­naldi eta jaiotza hartan Kar­meleren ginekologo pribatua izan zenak deklaratu zuen; eta bestetik, umea jaio eta hil ze­nean, Do­nostiako Arantzazu Ospitaleko pediatra burua zenak. Karmeleren ginekologo pri­­batuak haurdunaldiari eta ondorengo jaiotzari buruzko datuak eman zituen. Hel­burua, Karmele haur horretaz haur­dun egon zela, eta haurra jaio zela demostratzea izan zen. Ondoren, garai hartan Donostiako Ospitaleko pe­diatra burua zenak deklaratu zuen. Azaldu zuenez, 1978ko kasua izanik, ez da go­go­ratzen zein izan zen umearen bilakaera. Hala ere, azaldu zituen orduko informean irakurritakoa eta Arantzazu Ospitalak berak nola fun­tzionatzen zuen. Pediatraren esa­netan, umea 7 hila­bete­rekin jaio zen eta 1 ,260 kilo pisatu zituen. Ondorioz, zain­tzapean utzi zuten. Gainera, azaldu zuenez, aurreratzen diren ume askok bezala, honek ere birikak erabat garatu gabe omen zituen jaio­takoan, eta jaio eta 25 egu­netara hil egin omen zen. Horrez gain, pediatra buruak adierazi zuen, gezurra dela ez ziotela ikusten utzi.

«Umea ondo ari zen pisua hartzen eta aste horretan ekarri behar nuen etxera»
Deklarazioa entzun ostean, Karmelek argi eta garbi dio Pediatrak esan zuena ez dela egia: «umea 7 hilabeterekien eta pisu gutxirekin jaio zela egia da. Baina `bizitu´ zen 25 egunetan ondo jaten zuen. Ni joaten nintzen esnea ematera, eta ikusi nuen azken egu­nean, 2,300 kilo pisatzen zi­tuen. Pisua ondo hartzen ari ze­la esan zidaten, eta ustez hil zen aste horretan bertan gi­nen umea etxera ekar­tze­koa» Umea ikusteko aukera izan zuelari erantzunez, Kar­lemek dio, gezurra dela, berak ez zuela ikusteko aukerarik izan: «te­lefonoz deitu, eta hil egin zela esan zidaten. Biriketako ara­zorik zuenik ere ez ge­ne­kien. Esnea kontrako eztarrira joan, eta itota hil zela esan zi­daten. Hil eta gero, erre­sidentzian eduki zuten hiru egunetan, in­bestigatu egin behar omen zuten. On­doren, umea kaja prezintatu batean entregatu zidaten, eta ez niri, ez senarrari, ez nire amari, ez inori, ez ziguten ikusten utzi. Fu­ne­rariara joateko esan zidaten, egin beharreko tramiteak egi­tera, eta beraiek ekarri zuten Hernaniko kan­posantura. Ka­ja prezintatuta ekarri zuten, eta hala enterratu behar izan genuen».

«Nitxoa irekitzeko eskatuko dugu orain»
Bi deklarazio hauek entzun ondoren, hurrengo pausua fiskalari nitxoa irekitzeko eskatzea izango da. Karme­leren abokatuaren ustez, epaileak ez du zertan trabarik jarri. Karmelek Kronikari aurreko elkarrizketan azaldu zioen moduan «nitxoa ire­kitzeko baimena eman­dakoan, bertan topatzen denarekin argitu­ko da za­lantzarik haundiena».