Gaur bete dira 50 urte Ereñotzuko Ur-Mia elkartea sortu zela, 1962ko urtarrilaren 12an ireki baitzituen ateak. Ospakizun haundia maiatza hasieran egiteko asmoa dute, baina asteburu honetarako ere, antolatu dituzte bi ekintza. Igandean, goizeko 10:00etan, elkarteko hildako kideen omenez, meza egingo da Ereñotzuko San Antonio elizan. Ondoren, 11:00etan, hamaiketako eder baten bueltan bilduko dira elkartean bertan.
Maiatzean, ekitaldi nagusiak
Ur-Mia elkarteko mus txapelketa apirilean hasiko da, eta final haundia izango da maiatzeko aurreneko ekitaldi nagusia. Horrez gain, ondorengo ekitaldiak dira besteak beste, hilabete horretarako antolatu dituztenak: bola txapelketa, txokolatada, musika, erakusketak, mendi irteera, bazkaria eta bertsolariak.