hauteskunde kanpainan egin zuten moduan, Udala bilera errondak egiten ari da auzoka. Helburua da, Udalaren eta herritarren arteko komunikazioa bultzatzea; hala, Udalak duen informazioa emango du, eta herritarren zalantza eta ikuspegi ezberdinak jasoko ditu.
Ekonomia, kanpainak, auzo batzordea... gai ugari hizketagai
Bileretan, Udalak auzoz auzo azalduko ditu hartutako erabakiak eta dituen asmoak, tartean, ondorengoak: Udalaren egungo egoera ekonomikoaren aurkezpena egin; kanpainan zehar jasotako gaiei erantzuna eman; azken hilabeteetan auzoetan izandako gertaerak jaso; eta auzoek ordezkaritza izango duten Batzorde bat sortzeko asmoaren berri eman.
Herritarren parte hartzea, garrantzitsua
Udalak azpimarratu du, garrantzi haundia duela herritarrek bilera hauetan parte hartzeak, eta hala adierazi dute Hernaniko Kronikara bidalitako oharrean: «guztiok gara beharrezkoak edozein gai jorratu eta garatzerako orduan».
Otsaila bitartean, bilera guztiak
Astelehen iluntzean egin zuten aurreneko bilera Antziolan, eta atzo Karabelgo bizilagunekin elkartu ziren. Hurrengo bi datak ere zehaztu dituzte. Gaur, 19:00etan, Martindegiko auzo elkarteko kideekin elkartuko dira, elkartean bertan. Urtarrilaren 16an, astelehenean, Lizeagako auzotarrekin bilduko dira, Larramendi 14ko lokalean, arratsaldeko 19:00etan baita ere. Eta adostuta duten azken data, urtarrilaren 18koa da, asteazkena. Egun honetan Santa Barbara auzoko bizilagunekin bilduko dira, 19:00etan, auzoko elkartean. Udalak azaldu duenez, datozen egunetan emango dute falta diren bileren egutegi zehatza.