Apeaderotik joaten dira Karabelgo ume asko Elizatxo ikastolara, egunero-egunero. Oinezko bide bakarra hortik dago, Karabelgo gurasoek diote, oso arriskutsua dela. Aspaldi eskatzen ari omen dira oinezko bide seguru bat Karabel eta Portu lotuko dituena «Karabelgo etxeak egin zirenetik». Azken urteetan, Udalarekin bilerak egin omen dituzte, eta oso jarrera ona azaldu omen du Udalak. Erremedio bat ere planteatu die Udalak eta urte gutxi barru egitekoa gainera. Bitarte horretan, ordea, irtenbide probisionalen bat eskatu dute bizilagunek.
«Beldurgarria izaten da panorama»
Karabelgo guraso horiek beraien egoera zein den azaldu nahi izan diote Hernaniko herritarrei. «Trena pasatzen denean, umeei heldu egin behar izaten diegu, edo farolei eusteko esan. Beldurgarria izaten da panorama. Goizean, justu ordu horretan, tren azkar bat pasatzen da Hernaniko apeaderoan. Momentu horretan, gurasoei heldu, eta trenbideari bizkarra ematen diogu, trenak botatzen duen haizeagatik. Ume karroak dituztenek, eskilarak ezin dituzte igo, eta beraz, zubia azpitik pasa, apeaderoko beste andeneraino joan, eta trenbidea gurutzatu behar izaten dute, badenetik; batzutan irristatu egiten dira karroak, edo gurpilak trabatu, edo… Bide seguru bat behar dugu haurrak oinez joan ditezen».
Oinezko bidea, Karabelgo urbanizazio berriarekin
Udalarekin izan dituzten bileretan, erremedio batzuk planteatu zaizkie auzotarrei. Laster etxebizitza berriak egingo dituzte Karabelen, eta zubia ere berritu egingo dute. Hori egindakoan, errepidea ere berritu egin behar omen du Udalak, Karabeletik Portura, eta orduan egin nahi lukete oinezko bide bat.
Erremedio probisionala
Guraso talde honek dioenez, oinezko bide berri hori egin bitartean, erremedio bat behar dute, probisionala bada ere. «Trenbidearen azpikaldetik, egin liteke bidetxur moduko bat, adibidez. Hori ondo legoke, irtenbide probisional moduan».
Guraso hauetako batzuk, protesta modura, egun batzuetan errepidetik joateko asmoa azaldu dute. Datorren astetik aurrera, ostegun batzuetan, guraso eta umeak elkartu eta errepidetik joango dira Elizatxo ikastolaraino. «Gure ondoeza azaldu nahi dugu, besterik ez. Sortu ditzakegun arazoengatik barkamena eskatzen diegu kotxe gidariei, aldez aurretik. Horregatik, aldez aurretik jakinarazi nahi diegu, ostegun batzuetan ume eta guraso koadrila aurkituko dutela errepidean, goizeko 08:40ak aldera».