Mikel Lujanbio Xapo hernaniarrak ikusgai jarriko du bihar Donostiako Santo Tomas ferian, Ven, 1.580 kiloko zezena. Zazpi urteko zezena da, Azpeitiako Agite baserrian jaioa, eta bertan hazia. Blonda Akitania arrazakoa da, eta lehiaketa askotan irabazi ditu sariak, bai Euskal Herri mailan, eta baita Espainian ere. Lujanbiok, Abere Haragiak enpresako arduradunak, erosi du, eta hain ikusgarria izanik, ferian ikusgai jartzea erabaki du. Donostiako Okendo plazan egongo da, Maria Cristina hotela eta Victoria Eugenia antzokiaren artean, goizeko 10:00etatik 17:00etara.
«Oso haragi goxo
eta xamurra du,
ondo gobernatua dago»
Lujanbiok azaldutakoaren arabera, jan eta lo besterik ez du egin, eta beti oso ondo gobernatuta egon da. Beraz, nahiz eta ez gauden zezenaren haragia jatera ohituta, Venek oso haragi goxo eta xamurra izango du. Kanalean, 1.100 kilo pisatuko dituela aurreikusten dute.
Ven zezena erosita, Abere Haragiak enpresak bere lana ezagutzera eman nahi du ostalarien artean.
2.500 plaza gehiago RENFEk, Donostiara joateko
Goizeko 10:00ak eta 12:00ak bitartean gerturatzen da jende gehien Donostiara, Santo Tomas feriara. Hori kontuan izanda, tarte horretan RENFEk plaza gehiago jarriko dituela jakinarazi du.
Goiz Eguzkin ere,
txistor-jatea bihar
Goiz Eguzkiko kideek txistor- jatea antolatu dute bihar, Santo Tomas eguna ospatzeko. Ondoren, kaleko eta mahai jokoetako sari banaketa egingo dute, udazken-neguko txapelketetakoa.