Bigarren Mundu Gerran, naziengandik ihesi zebiltzan 3.000 bat abiadore eta lagun, Comete Sareak egindako lanari esker salbatu ziren. Sare horri buruzko pelikula-dokumentala egin dute Enara Goikoetxea eta Iurre Telleria hernaniarrek, Azken Bidaia izenekoa, eta Biterin aurkeztuko dute gaur, 19:00etan. Musika, berriz, Joxan Goikoetxea hernaniarrak egina da. Dokumentala, 1943ko urtarrilaren 15eko gauetik abiatzen da. Hurrengo egunean, Urruñako Bidegain-Berri baserrian 6 lagun atxilotu zituzten alemanek. Florentino Goikoetxea mugalari hernaniarra libratu egin zen. Dokumentala ikusi ondoren, kolokioa izango da.
Asteburuan ere ikusgai
Dokumentala bihar ere ikusgai egongo da, 19:30etan eta 22:30etan, eta igandean, 19:30etan. Umeentzako berriz, Las aventuras de Tintin: El secreto del Unicornio emango dute asteburuan.