Zortzi finalistak eta Illunbe prest, egun haundirako

Gipuzkoako Bertsolari Txa­­pelketako finala igandean jokatuko da, Illunben. Zortzi hilabeteren ostean, bertan erabakiko da Gipuz­koa­ko 2011ko bertsolaririk onena zein den. Eta titulu hori lortu eta txapela jantzi nahian, 8 bertsolari neurtuko dira: Unai Agirre, Jexux Mari Irazu, Agin Rezola, Beñat Gaz­telumendi, Aitor Sarrie­gi, Iñaki Apalategi, Alaia Mar­tin eta Jon Martin. Her­nanik ordezkaritza zabala izango du, aipatutako aurreneko lau finalistak Hernani­ko Bertso Eskolako kideak baitira. Atzo aurkezpen ekitaldia egin zuten Illunben, Bertso­zale Elkarteko ordezkariek eta Juan Karlos Izagirre Do­nos­tiako alkateak, 8 finalistekin batera. Elkarteko eta Uda­leko ordezkariek ilusio haundiz espero dute igandeko fi­na­la. Aurreikuspen guztiak gaindituta, 9.600 lagunetik go­­­ra es­pe­ro direla azpimarratu zu­ten, txapelketa osoan izan den erantzun bikainaren bidetik ja­rraituz. Txapelketa osoan zehar, 25.000 bertsozale inguru ibili dira Gpuntuko saioetan, «jende-oldea izan da aurtengo Gpuntuaren ezaugarri na­gusia», azaldu zuten Ber­tsozale Elkarteko ordezkariek.

Ateak, 15:00etatik irekita
Finala 16:30etan hasiko da, baina ateak 15:00etan irekiko dira eta bitarte horretan, DVD bat egongo da ikusgai. 16:30etan, kontzertutxo bat emango du Elkano Brow­ning Cream taldeak, Gari abes­lariarekin. Ondoren, bertsolariek hartuko dute hitza eta 20:45ak inguruan jakingo da txapeldun berria zein den. Laxaro Azkunek jantziko dio txapela txapeldun berriari.

Garraio publikoa erabiltzeko deia
Antolatzaileek jakinarazi du­te­­nez, autobus zerbitzu bereziak izango dira eta garraio pu­blikoan joateko deia egin du­te. Eta kotxean joatekotan, kotxeak konpartitzeko eskatu dute.

Azken sarrerak gaurtik salgai, interneten
Larunbatean, internetez salgai zeuden sarrera guztiak bu­­katu ziren, baina azaldu dutenez, gaur, 10:00etatik aurre­­ra, az­ken sarrerak erosteko aukera izango da. Her­nanin, Tripon­tziko sarrerak bukatu dira.