euskal musikaren ahots liluragarri, aberats eta egiazkoena entzuteko aukera izango da bihar Hernanin. Maddi Oihenart zuberoarrak kontzertua eskainiko du Hernani´n Musik ekimenaren barruan, Biteri kultur etxean, arratsaldeko 19:30etan. Oihenartek, kantatzerako garaian, ihes egiten du edozein kantu-arau edo modelo-estilistikoetatik, eta horregatik egiten du abesti bakoitza hain berezi. Barru-barrutik kantatzen du, a capella.
«Ahots berezia, ezaguna»
Hernani´n Musikeko antolatzaileek diotenez, neurria haizeak markatzen dio Oihernati, eta gidari, natura, sentimentua eta sena ditu: «oso ahots berezia da, ezaguna munduan zehar. Xuberoako kantu estilo berezia du, eta gaur egungo ahotsen artean, berea, nagusienetakoa da».
Joan den urteko proiektua aurkeztera
Abeslari zuberoarrak joan den urtean aurkeztutako lana plazaratuko du gaur Biterin. Antolatzaileen esanetan, euskal kulturak presentzia izan behar du Hernani´n Musiken, eta oraingo honetan Oihenartek emango dio esklusibitate hori.
Atarikoa, Onintza Albeniz arpajole hernaniarrak
Hernaniko musikariei bidea eman nahian, Hernani´n Musikek Onintza Albeniz arpajole hernaniarra gonbidatu du. Albenizek Donostiako Kontserbatorioan ikasten du, eta gaurkoan Atarikoa jotzeaz arduratuko da.
Sarrerak, Biterin
Kontzerturako sarrerak Biteri kultur etxean daude salgai, 6,5 euroan.