joan den ostiralean Zerbitzu Publikoen Batzordean bi fakturari buruz aritu ziren, organikoa Lapatxera eramateagatik ordaindu beharrekoak. Bi faktura horiek pendiente zeuden, «fakturak egin zituen enpresarekin adostasunik ez zegoelako», hala dio Batzordeko txostenak. 2010eko maiatzetik, 2011ko urria bitarteko fakturak dira, 96.000 euro eta 125.000 eurokoak.
Hamaikabat: «Zerbait esan nahi du, Batzordea 08:00etan jartzeak»
Hamaikabat alderdiak prentsa oharra bidali du Hernaniko Kronikara, eta salatu du, Udala izkutuka aritu dela gai honen inguruan, fakturak izkutatu, eta nahi duenean atera dituelako agerira. «Zerbait esan nahi du Batzordea goizeko 08:00etan konbokatzeak. Batzordeetan jendeak parte hartzea aldarrikatzen duen Gobernu Talde honek sinisgarritasuna galtzen du, goizean goiz Batzordeak konbokatuta». Hamaikabatek dioenez, Udalak ez du konponbide batera iritsi nahi izan fakturak egin dituzten bi enpresekin (San Markos eta GHK), arduradunak aldatu dituzten arte. «sektarismoa deitzen zaio horri. Gure partiduak gobernatzen badu, ordaintzen dira fakturak, beste batzuk gobernatzen badute, fakturak izkutatu, eta urtebetez gorderik edukitzen dira. Garbi jokatzeko eskatu nahi genuke, propagandak utzita».
Gobernu Taldea: «Lapatxek guri egin behar zigun faktura, baina ez San Markoren bitartez»
Gobernu Taldeak Kronikari jakinarazi dionez, bi faktura horiek pendiente zeudela gauza jakina zen, eta aurrekontuetako partida bat gordetzen joan dira, arazoa konpondutakoan ordaintzeko. «Kontua da, Lapatxera Hernaniko Udalak zuzenean ematen duela organikoa, eta beraz, Lapatxek (GHK S.L.) Udalari egin behar diola faktura. Baina ez du hala egin. San Markori fakturatu dio, eta San Markok Udalari. Horrek ez luke horrela behar Udalaren ustez, eta aklaratu arte, fakturak ez ordaintzea erabaki da. Orain aklaratu dugu, eta kitto».