Etapa hau, bai bere distantziagatik, bai bere orografiagatik, Done Jakueren Barruko bideko etaparik erosoenetakoa dugu. Azken etapa honek panoramika ezin hobeago batez gozatzeko aukera emango digu Demandako mendizerra, aurrez aurre dugula beti. Bide guztian 2.271 metro dituen San Lorenzo mendiaren profila izango dugu lagun. Done Jakueren Barruko bidea Bide Frantsesarekin elkartzen da Santo Domingo de la Calzadan. Gehiago zehaztuta, bideen elkarketa herriko katedralaren aurrean dagoen enparantzan gertatzen da. Hemendik Santiago de Compostelara kilometro asko geratzen dira, baina guk, Mendiriz-mendikoek, hemen bukatuko dugu 5 urte hauetan, Baionatik abiatuta, Euskal Herri osoa zeharkatzen duen bidea.
Bidea, eliza eta
monumentuz josia
Ibilbide osoan asko dira bisita merezi duten eliza eta monumentuak. Guk horietako batzuk aipatuko ditugu. Haron Santo Tomas parrokia eliza dugu, XVI. mendekoa. Zerratón herrian aipagarria da XIII. mendean eraikitako Asunción parrokia eliza. Bañaresen ikustekoak dira, Santa Cruz-eko eliza (XV-XVI) eta Santa Maria de la Antigua ermita (XII).
Santo Domingo de la Calzadan, Katedrala (XII).
Oilo eta oilarrak kantuan, erre eta gero ere...
Kondairak dioenez Santiagora bidean Alemaniako erromes familia bat hurbildu zen Santo Domingora eta mesoi batean ostatu hartu zuten. Mesoiko neskatxa maitemindu egin zen familiako seme gaztearekin eta horrela azaldu omen zion mutilari. Baina gazteak kasurik egin ez. Umiliaturik, neskak mendekua hartzea erabaki zuen. Horretarako, familiak bideari berriz ekin zioenean, zilarrezko edalontzi bat gorde zuen gaztearen zorroan. Familia urrundu zenean, Korrejidorearengana joan eta lapurreta salatu zuen. Erromes gaztea urkatu egin zuten.
Gurasoak samindurik, tristurak hartuta, semearengana inguratu, eta bizirik zegoela iruditu omen zitzaien, eta korrejidoreari esan. Korrejidorea bazkaltzen ari zen eta hala erantzun omen zien: Zuen semea, jatera noan oilo eta oilar erre hauek bezain bizirik dago. Une horretan platereko oiloa eta oilarra kantuan hasi omen ziren.
Santo Domingo de la Calzada;
donde canto la gallina
después de asada
Gertaera horren oroimenez berpiztu ziren oilo eta oilar horien ondorengoak omen diren oilo eta oilar zuri bat bizirik mantentzen dira urte osoan Katedral barruan.
20 km-ko bidean, 4 orduz
Haron hasiko gara, Bartolomé Cossio enparantzatik. Errotonda batean, ezkerrera. San Millan de la Cogolla etorbidean, segi zuzen. Errepide ertzetik ibiliz, 2 eta 3. puntu kilometrikoen artean, AP-68 autopista gainetik igaro. Apur bat aurrerago errepidea utzi eta eskubira dagoen pista bat hartu. Hirurehun bat metrora, ezkerrera, partzela-pista bat. Mahasti artean aldapa batean gora. Aldapa igota, lehenengo herria ikusten da. Aurrerago, N-232 errepidearekin egingo dugu topo. Errepidea gurutzatu eta bideari segi. Berehala gara Zamaca ibaiaren ertzetan. Ibai aldera jaitsi, aldapa bat igo, eta Zarraton herrian gara.
Asunción eliza ezkerrean utzi, eta berrogei bat metrora Somo de Villa kaletik, ezkerrera. Aurrerago eskubira, eta San Andres ermita ondoan jaiotzen den pista hartu behar da. Segi bideari, Madrid de los Trillos herrixkaraino.
700 metro aurrerago errepide bat gurutzatu, eta bideari jarraituko diogu, LR-203 errepideraino. Haren ertzetik, Bañares herrira.
Real de Abajo kaletik Udaletxea pasa, eta. eskubira, Donantes de Sangre etorbidea hartu. Ezkerrera, El Castillo kaletik Bañares atzean utziko dugu. Asfaltatutako nekazal bide batetik, ezkerrera kurba bat egiten duenean aurrera, Santo Domingo de la Calzadarako pista hartu. Kilometro pare bat aurrerago N-120 errepidea. Zubitik igaro eta berehala gara Santo Domingo de la Calzadan. Katedraleko plazarengatik galdetu.