Mendi lasterketen mundua ondo ezagutzen duen norbait badago, hori Oihana Kortazar elgetarra da. Ez dira urte asko pasa probetan parte hartzen hasi zenetik, baina lortutako emaitzei erreparatu besterik ez dago ikaragarrizko esperientzia duen emakumea dela konturatzeko. Ibai Mendi Hernaniko dendak gonbidatuta, Biterin egongo da gaur arratsaldean Kortazar, bere esperientzia propioa kontatu eta ikusleen zalantza guztiak erantzuteko: «ikusleen zalantzak argitu eta galderak erantzunda azaltzen dut ondoen nor naizen eta zer egiten dudan».
Kortazar ez da Ibai Mendiren gonbidatu bakarra izango gaur; hitzaldian izango dira baita ere Euskal Selkzioko arduraduna eta prestatzaile fisikoa, Jokin Lizeaga korrikalaria eta Oier Ariznabarreta. Hitzaldia 19:00etan hasiko da, eta ikusleek ponentziak entzuteaz gain, nahi adina galdera egiteko aukera izango dute.
«Espero baino garaipen gehiago lortu ditut»
Errepideko duatloiak egiten hasi bazen ere, mendiak beti xarma berezia izan du Kortazarrentzat, eta probatzeko asmoz 2008an hartu zuen parte aurreneko mendi lasterketan. 2009ko denboraldia ondo prestatu, eta Espainiako Txapelketa irabaztea lortu zuen. Haurdunaldia medio, urbeteko atsedenaldia hartu zuen 2010ean, eta lasai aritzeko asmoarekin bueltatu zen 2011ko urtarrilean txapelketetara.
Espero ez bezala, urte hau izan da Kortazarren onena txapelketei dagokienean, elite mailan dauden ia guztiak irabazi baititu, hala nola, Espainiako Txapelketa eta Kopa, Europako Txapelketa eta Konbinatua, Munduko Kopa... Aurrera begira berriz, lasterketa inportateak irabaztea du helburu: «asko dira garrantzitsuak diren lasterketak. Buruan asmo eta ilusio batzuk baditut, baino egutegia ikusi arte ez dut erabakirik hartuko».
2011KO PALMARESA:
l Irabazle, Espainiako Txapelketan
l Irabazle, Espainiako Kopan
l Irabazle, Lasterketa Bertikalean, Munduko Kopan
l Irabazle, Europako Txapelketan
l 2garren, Europako Lasterketa Bertikalean
l Irabazle Europako Txapelketa Konbinatuan
l Irabazle, Munduko Kopan