Herri musikari buruz egin den dokumentalik ezagunenetakoa izango da ikusgai, gaur 20:00etan, Biterin. Fernando Larruquert zuzendariaren Euskal Herri-Musika (1978) emango dute, Hernani’n Musik programaren barruan. Larruquert bera, bertan izango da eta pelikularen ostean, mahaingurua egingo da Juanmari Beltran eta Txomin Artola solaskide dituela. Sarrerak dohainik ari dira banatzen, Biterin.
Lanaren eta musikaren
arteko harremana
Fernando Larruquert-en Euskal Herri-Musika film ospetsuak, lanaren eta musikaren arteko harremana azaltzen du 68 minututan. Arrantzaleen, artzainen eta baserritarren bizitza eta doinuak erakusten ditu; kobazulotan bizi ziren gizakien antzinako oihuak ahaztu gabe.
Ikuspegi ahalik eta zabalena eskaintze aldera, gertaera sozialak aipatzen ditu Larruquert-en lanak, eta baita pasarte gatazkatsuak ere. Horien berri emateko sortzen baitira herrietako kantuak.
Horrez gain, euskal musika tresnak modu zehatzean deskribatzen dira eta baita bertsolaritza ere.
Ikastetxeetan, proiekzioak
Pelikulaz gain, gaur, Hernaniko ikastetxeetako ikasle taldeei proiekzio bereziak eskainiko zaizkie. Goizeko 09:00etan, Urumea, Elizatxo eta Inmakuladan izango dira. Langile Ikastolan, berriz, goizeko 11:00etan.