Azaroaren 7an, urte eta erdi bete zen Hernanin Atez Atekoa jarri zela eta 18 hilabeteotan lortutako datuen berri eman zuen joan den astean Luis Intxauspe alkateak, Hernanin Zero Zabor taldeak gonbidatuta. Alkateak emandako datuen artean nabarmendu zuen, errefusak izan duen jaitsiera. 2009an, Atez Atekorik gabe, 450 tona errefusa sortu zuten hernaniarrek, hilabetero. Atez Atekoa jarri zenetik, 100 tonatara ez da iristen errefusa kopurua. Dena dela, zer hobetu badela azaldu zuen Intxauspek, Zero Zabor bidean. Udalaren erronka, errefusa gutxitzea eta erraustegia gelditzea dela gaineratu zuen: «errefusarik ez bada sortzen, zer errerik ez du izango erraustegiak. Eta zer errerik ez badu, erraustegirik ez da behar». Horrez gain, Hernaniko garbigunea urtarriletik martxan izango dela jakinarazi zuen.
%30 birziklatzetik %80ra
Birziklatze kopuruak asko hobetu direla ere azaldu zuen alkateak. %30 birziklatzetik %80 birziklatzera pasa dira hernaniarrak. Alde haundiena organikoan izan da. 2009an ez zen organikorik birziklatzen eta egun, 135 tona inguru organiko birziklatzen da hilean. Ontzi arinen kasuan ere, igoera izan da. Atez Atekoaren aurretik, 30 tona azpitik birziklatzen zen; Atez Atekoarekin 45 tona inguru. Papera eta kartoiaren eta beiraren kasuan, ez da hainbesteko aldea izan. Kasu horietan herritarrak nahiko kontzientziatuta zeudela ondorioztatzen da. Bestalde, azken aldian, ontzi arin eta papera eta kartoi kopuru gutxiago bildu da eta Udalak ez daki zerk eragin duen: krisiak, kontsumitzeko ohitura aldaketak...
Hondakin kopurua,
ia erdira jaitsi da
Alkateak emandako datuetan adierazgarria da hondakinak orokorrean, ia erdira jaitsi direla. 2009an, 404 kg hondakin sortu zuen hernaniar bakoitzak eta aurten, orain arte, 263 kg. Horren arrazoia, batez ere, gremioek lehen, obrako hondakinak kontainerretara botatzen zituztelako dela uste du. Krisiak ere eragina izan dezakeela uste du. Baina ez dela, batzuk pentsatu bezala, ondoko herrietara eraman delako, «beste herrietan ez baita igo hondakin kopurua».
Konpostak %99,76ko purutasuna, poltsarik erabiltzen ez delako Hernanin lortzen den konpostaren purutasuna %99,76koa da eta horren arrazoia, organikoa biltzerakoan poltsarik ez erabiltzea dela azaldu zuen Intxauspek. «Konposta egiten den ia leku gehienetan, organikoa poltsetan jasotzen dute eta horrek eragina du. Kasu horietan purutasuna %80 inguru izaten da». Eta horren alde lanean jarraitzeko asmoa du Udalak.
Arratoiak, obren eraginez
Autokonpostaren datuak ere eman zituen Alkateak. Egun, 620 familiak egiten dute autokonposta. 76 gehiago ere izan dira, baina utzi egin dute. Batzuk arratoiak azaldu direla eta utzi dute. Honi lotuta, Intxauspek argi utzi zuen konposta ondo eginez gero, arratoiak ez direla azaltzen eta hori, Hernanin azken aldian izan diren, eta martxan diren obrek eragin dutela.
Datu aurkezpenera, beste herrietatik ere gerturatu ziren udal ordezkari, teknikari eta herritarrak. Lasarteko teknikariak azaldu zuen, soterratuak, sekulako arratoi kabiak direla eta sekulako aberiak eragiten dituztela.
Uholdeen eraginez sortutako hondakinekin Udalak izandako erantzunaren berri ere galdetu zuen aurkezpenera joandako herritar batek. Udalak kontenedore bereziak jarri dituela azaldu zuen eta ez duela kobratu, hiri hondakinei dagokienean. Hondakin industrialetan, ez du konpetentziarik.