GERRA Zibilean frentean ibilitako hamaika gudariri elkarrizketa egin die Aitor Azurki donostiarrak, eta liburu bat osatu du horrekin: Maizales bajo la lluvia. «Istorio asko galdu dira, baina oraindik jendea badago, garai hura bizitu zuena, eta hitz egiteko gogoz». Gaur, 19:30etan, Biterin.
Usabiaga, komunisten batailoian ibilia
Hamaika elkarrizketa egin ditu Azurkik, alde errepublikarrean ibilitako euskaldunei eginak. Horietako bat, Hernanin izango da gaur: Marcelo Usabiaga. 95 urteko hernaniar honek komunisten batailoian borrokatu zuen. 21 urte kartzelan pasea, anaia fusilatua... oraindik ere indarrez kontatzen ditu orduan bizitutakoak.
«Ahal dugun guztia
errekuperatu behar dugu»
Aitor Azurki kazetariak aitona gudaria zuen, eta haren anaia gerrako haurra. Berak dio, oso gutxi kontatu ziotela kontu horiei buruz, eta grina zeukala historia hori biltzeko. «Aiton-amon hauek direlako Gerra Zibileko azken bozeramaileak».
MAIZALES BAJO LA LLUVIA - BI PASARTE:
Marcelo Usabiagaren testigantza, atxilotu berri, hilabetez Ondarretako kartzelan:
«Eguneko hogeita lau ordutan bakarrik zeldan, aislatuta, juizioaren zain... seguru nengoen fusilatu egingo nindutela, iheslaria nintzelako, eta gerrileroa! Etengabe buruan nerabilkien nola erreakzionatuko nuen hilko ninduen ejekuzio-pelotoiaren aurrean: paretean jarri eta froga egiten nuen, entsaiatu. Konplejua neukan, ez ote nintzen gai izango firme mantentzeko, zutik».
Manuel Goenaga, usurbildarra. 1936ko uztailaren 18a, larunbata:
«Biharamunean, igandez, Añorga eta Errekaldeko festak ziren. Joan ginen. Bidean ginela, kamioi bat, Eibartik zetorrena, Eibarko errepublikarrez beteta. Errekalden geratu ziren, Arpieta baserrian. Hango semeak kotxea bazuen (garai hartan ez zen normala) eta neskarekin joan zen paseatzera. Arratsaldez Errekaldera etorri zen, eta eibartarrek alto eman zioten, dokumentazioa eskatzeko edo... Bera zijoan txofer, eta izutu egin zen. Ez zekien zein ziren eta Hernani aldera ospa egiten saiatu zen. Eibartarrek tiro egin zioten atzetik, eta andregaia hil zioten. Hala hasi zen dena».
Horrela hasi zen guda, Goenagarentzat.
BIGARREN EDIZIOA:
Aitor Azurkik apirilean argitaratu zuen liburua, eta 1go edizioa agortu egin zen. 2garren edizioa atera du, eta herriz herri dabil, aurkezten. Katalunian eta Valentzian aurkeztuko du berehala.