Victor Goikoetxea muralista hernaniarra, Marruekosen izan berri da ikastaro bat ematen. Valle de Dadesen, hain zuzen. Dades Marruekos hegoaldean dago, desertutik gertu, Marrakechetik 5 bat ordutara. Goikoetxeak urtero ematen du ikastaroren bat, Euskal Herritik kanpo, iaz ezin izan bazuen ere, Santurtziko murala egiten aritu baitzen. Eta aurten Marruekosen izan du aukera. «Bertan, nere bi lagunek Kasbah bat dute (gaztelu antzekoa), hezitzaile frantsesak dira, zenbait tailer antolatu izan dituzte bertan, eta aukera sortu zen», azaldu dio Kronikari. Hala, internet bidez ikastaroaren berri eman eta 12 ikaslek hartu dute parte. Espainia, Brasil, Frantzia eta Greziakoak izan dira ikasleak.
Ikastaro intentsoa
Pintura muralari buruzko ikastaroa eman die Goikoetxeak, bere teknikak irakatsi dizkie eta oso gustora geratu da ikastaroarekin. «5 astetako ikastaro intentsoa izan da, ikasle bakoitzak 5 obra egin ditu, bakoitzak etxera eraman dituenak. Brontzezko eskultura bat ere egin dugu eta denen artean mural bat 5 metro zabal eta 3 metro luze dena. Hotelean bertan utzi dugu, opari gisara», dio.
Esperientzia oso interesgarria izan dela nabarmendu du Goikoetxeak, tailerraz gain, asteburuetan irteerak eta ekintzak antolatu dizkietelako eta ingurua gertutik ezagutzeko aukera izan dutelako. Goikoetxea aurretik ere egona da hainbatetan, Marruekosen. Motxilero moduan, lehenengo aldian.
Buelta, bizikletan
Goikoetxeak Kronikari azaldu dionez, bizikletan bidaiatzea asko gustatzen zaio. Ia mundu erdia egina du. Eta Marruekosetik buelta bizikletaz egin zuen: 2.165km 19 egunetan. Astelehenean itzuli zen Hernanira, egunero 6 bat orduz ibili ostean. Bere ikasle batekin abiatu zen, toledoarra berau, baina hirugarren egunean utzi egin behar izan zuen tendinitis baten eraginez. Bidaia haundi bat egiteko prestaketa moduan egin duela dio Goikoetxeak. «Etiopia bizikletaz egin nahiko nuke hurrengo bidaian. Ingurua ezagutu eta Olaranengana joateko ere aprobetxatuko nuke», aurreratu dio Kronikari. Goikoetxeak jendea animatzen du bizikletan bidaiatzera.
Eskuartean, hainbat proiektu
Goikoetxeari eskuartean dituen proiektuez galdetuta, hainbaten berri eman dio Kronikari. Besteak beste, Donostiako Caravanserai jatetxea itxura aldatu behar dute orain. «Marruekoseko tailerrean egon den ikasleetako bat da bertako jabea eta jatetxeari ukitu desberdina eman nahi ziola aipatu zidan eta horretan hasiko gara. Nere beste lau ikaslek ere parte hartuko dute».
Horrez gain, Aquariumeko ate batzuk bukatzeko dauzka eta Bartzelonan Gran Vian beste lan bat aurkeztuko du urtarrilean.