Asegururik ez daukatenek, eta uholdeak kalteak eragin badizkie, aukera bat badaukate diru-laguntzaren bat kobratzeko. Horretarako, Espainiako Gobernuak diru partida batzuk atera ditu, eta eskaerak egin beharko dira, orain hasi eta abenduaren 6ra bitartean. Gainera, asegurua daukatenek ere diru-laguntza horiek jaso ahal izango dituzte, berez galtzen duten %7 errekuperatu ahal izateko. Kontuan hartu behar da, kasu guztietan, aseguratuta daudenek %7 behintzat, galdu egiten dutela. Hori da Hernaniko Udalak jakinarazi duena, eta horretarako, herritarrei eskatu diete, Udaletxetik pasatzeko, asteazkenetik aurrera. Aldez aurretik, orri bat bete beharko dute, interneten aurkituko dutena: www.hernani.net.
Bilera atzo baserritarrekin
Kalteak jasan dituzten baserritarrak bildu ziren ostirala Kutxa-Ekogunean, ENBA sindikatuak deituta. 40 lagun bildu ziren bertan, eta euren ondoeza azaldu zuten, sekulako kalteak jasan dituztelako, eta inork kontuan hartu ez dituelako. Komunikabideetan izan duten oihartzuna oso kaxkarra izan dela, eta kalteak ikaragarriak izan dituztela azaldu zuten. ENBA sindikatuak adierazi zien, diru laguntzak izango direla beraientzat ere, eta horretarako eskaerak egin behar dituztela, Udaletxearen bitartez, edo ENBA sindikatura joanda.