Begi guztiak Anoetara begira egongo dira gaur, 16:00etan, ligako bi indartsuenek jokatuko baitute bertan: Hernanik eta Bera Berak. Bi aurrenak dira; bi indartsuenak. Partidurik galdu gabe, bonus batzuren aldea dago bien artean. Hernani aurretik dago, bonus gehiago lortu dituelako. Baina gaur ikusiko da, zein den gehiago zelaian. Irabazten duenak jauzia egingo du sailkapenean, eta aurtengo helburu nagusia betetzeko bidean jarriko da.
Bera Bera, maila onenetik jaitsi den ‘zakur-zaharra’
Ohorezko A mailan jokatu du Bera Berak azken urteetan. Iaz jaitsi egin ziren, eta jokalari asko ditu, maila onenean jokatutakoak; zakur-zaharrak. Esperientzia horren kontra, Hernanik dauka sekulako indarra. Aurten «tiroa bezala» daude, arduradunek diotenez, eta hala gainditu dituzte Oviedo bezalako taldeak. Bera Berak erasoan asko jokatzen du, baina defentsa kaxkarra du. Hernanik hori aprobetxatu nahiko du, irabazteko, edo gutxienez, bonus bat lortzeko.
Entrenamendurik galdu gabe
Uholdeak direla eta, Landare zelaia zisko eginda geratu da beste behin: ez jokatzeko, eta ez entrenatzeko. Horregatik, talde nagusiak lortu du Zubietan jokatzea, eta entrenamendurik galdu gabe iritsiko da partidurik inportanteenera. Beste taldeek ere lortu dituzte entrenamendu zelaiak. Joan den astean suspenditu egin zen Independienteren kontrako partidua. Partidu hori datorren asteburuan jokatuko da, Santanderren, bi taldeek hala erabakita.