Amaiur koalizioak prentsaurrekoa eman zuen ostegunean, Biterin. Bertan izan ziren Hernaniko hainbat alderditako ordezkari eta herritar, hala nola, Luis Intxauspe alkatea, Aralar eta Ezker Abertzaleko ordezkariak, gazteak, kirolariak... Eta Amaiurren aldeko botoa eskatu zuten. Amaiurrek euskal gizartearekin hartzen dituen lau konpromisoen berri eman zuen: «Amaiur Euskal Herriaren bozgorailua izango da Kongresuan eta Senatuan, eta nazio gisa dituen eskubideen aldarrikapena egingo dugu; euskal herritarren ahotsa izango da, bere hizkuntz eskubideak zein eskubide sozialak, kulturalak eta ingurumenezkoak exijituz», horixe da Amaiurrek hartu duen konpromisoetako bat.
Estatuak negoziazio prozesuan inplikatu beharra
Euskal Herriak Espainiako eta Frantziako estatuekin daukan gatazka politikoa modu demokratikoan gainditzeko konpromisoa da Amaiurrek hartu duen bigarrena. «Madrilera joango gara Estatuari esatera, bake eta normalizazio politikoa lortzeko, elkarrizketa eta negoziazio prozesuan inplikatu beharra daukala. Gernikako Akordioa izango da gure bide-orria eta bere edukiak bultzatuko ditugu, bere osotasunean bete arte».
Erabakitzeko eskubidea; autodeterminazioa
Hirugarren konpromisoak Euskal Herriari eta bere eskubide nazionalei egiten die erreferentzia. «Hego Euskal Herriko lau herrialdeetako biztanleriaren borondate demokratikoa errespetatzeko lan egingo dugu, Nafarroako errealitate politikoa eta nafarrek hartutako erabakiak aintzat hartuta. Euskal Herriaren etorkizunari buruzko erabakia euskal herritarrei bakarrik dagokie. Erabakitzeko eskubidea defendatuko dugu; autodeterminazio eskubidea. Euskal gizartearen gehiengoak hala erabakiz gero, independentziari eta estatu propioa osatzeari atea irekiko diogu».
Enpleguan eta gizartean politika propioak
Amaiurrek gizarte eredu berri bat ere badu helburu. «Bizi dugun krisi ekonomiko latza eta langileen kontrako murrizketa larriak aintzat hartuta, langileen eta babesik txikiena dutenengan esku-hartze berezia egingo dugu. Lan Harremanen eta Babes Sozialen Euskal Esparrua aldarrikatuko dugu Madrilen, enplegu eta gizarte politika propioak indarrean jarri ahal izateko. Eta prekaritatearen aurka egingo dugu, enplegu duina, kalitatezkoa eta eskubideduna sortzea exijitzeko, beti ere, sektore publiko indartsuaren alde eginez. Horrez gain, pertsona guztien arteko berdintasun erreala bilatuko dugu».
Hori horrela, Amaiurrek euskal gizartearen konfiantza eskatzen du azaroaren 20ko hauteskundeei begira.
Gaur Belodromora
joateko deia
Amaiurrek ekitaldi nazionala egingo du gaur 17:00etan Belodromoan, eta herritarrei dei egiten die bertara joateko.