ARGAZKIAK IKUSI (astelehena, azaroak 7)
ARGAZKIAK IKUSI (igandea, azaroak 6)
«Poligonoetan sekulako kalteak eragin ditu; batez ere, Eziagon. Ibaiondon, eta beste industriaguneetan kezkagarria da egoera, baina oraindik kalteak kontabilizatzeko daude», adierazi zuen atzo, Luis Intxauspe Alkateak, urak eragindako kalteak zenbatekoak izan ziren adierazteko. Hondamendi egoera izendatzea ez omen da posible gaur egun, baina diru-laguntzak ematen omen dira, eta hori aztertzen ari dira Udala, Diputazioa, eta Jaurlaritza.
Hernanin bulego bat jarri dute, informaziorako, eta bertara jotzeko eskatu die Udalak kaltetuei: Hernaniko Alkatetzan atendituko da jendea, eta baita telefonoz ere: 943337010 edo 943337011.
Horrez gain, Donostian ere beste informazio bulego bat jarriko dute, enpresentzat eta Udalentzat.
Kirol instalazioetan eta enpresetan, sekulako kalteak
Luis Intxauspek adierazi duenez, bereziki kezkatzekoa da Hernaniko zenbait industriaguneetan urak eragindako kaltea. «Eziago oso gaizki dago; kalterik haundienak han eragin ditu. Enpresa txikiak dira Eziagokoak, eta ia denek jasan dituzte kalteak. Beste poligonoetan egoera ez da askoz hobea. Kirol instalazioak, Zubipe eta Landare, penagarri geratu dira; Zubipen, seguru asko, belarra erabat aldatu beharko da». Horrez gain, Hernaniko baratze-lurretan ere ezin konta ahala kalte eragin ditu igandeko uholdeak.
«Bizilagunen etxean lo egin dugu bart»
Uholdeek biharamun gogorra utzi dute Hernanin, Gipuzkoako beste hainbat lekutan bezala, eta atzo, nabarmena zen hori, Karabel, Portu eta Floridako 40 bat etxebizitzetan. Zenbait bizilagun larri ibili ziren, urak etxera sartzen hasi zirenean. «Kolpera egin du urak gora. Ikusten genuen bazetorrela, baina azken kolpea oso azkar egin zuen; eta gu, gauzak ateratzeko denborarik gabe. Lehen ere sartu izan dira urak Karabelgo etxeetan; horrenbesteraino, ordea, 1973an; geroztik ez», dio Karabelgo bizilagun batek. Bizilagunek ez dute etxean lo egiterik izango pixka batean. Udalak adierazi du, inork lotarako lekurik behar badu, eskatzeko Udalean, eta jarriko zaiola. Atzo askok bizilagunen edo familiako norbaiten etxean lo egin zuten.
Ereñotzun bidea moztuta, hiru puntutan
Latxen eta Ubarreton bi lur jausi haundi eragin ditu urak, eta Fagollagan ere urak atera ziren. Ondorioz, Goizuetarako bidea itxita egon zen, hiru puntutan. Atzo goizean oraindik garbiketa lanetan ari ziren. Horrez gain, Elorrabin, zubia eraman zuen urak igandean, eta beste zubi batzuetan enbor asko pilatu ziren: Karabelgo zubi txikitik hiru kamioika egur atera zituzten goizean, eta Abillasko zubian enborrak pilatuta ikusi zitezkeen eguerdi partera arte.
308 litro 56 ordutan, metro karratuan
Historiako eurite haundienen artean dago asteburukoa, Rodolfo Ares Barne Sailburuak atzo adierazi zuenez. Añarbeko datuek diotenez, 308 litro bota zituen metro karratuan, eta 56 ordutan.
Horrez gain, 10 miloi metro kubiko ur hartu zituen Añarbek, eta ateak erabat itxi zituen uholdearen momentu gogorrenetan. Horiek Urumeara bota izan balitu, %75 ur-gehiago joango omen ziren ibaira, segunduko 187 metro kubiko sartu baitziren urtegian, momentu batzuetan. Atertu zuenetik, Añarbe ura askatzen ari da, eta hala jarraituko du, urtegia hustu dadin, berriz egoera larritzen bada ere. Oraingoz, eguraldi parteak dioenez, euririk ez du egingo gaur, eta pixka baterako lasaitasuna izango da.
ARGAZKIAK IKUSI (astelehena, azaroak 7)
ARGAZKIAK IKUSI (igandea, azaroak 6)