Irati Sarasua
40 urte baino gehiago pasa dira Hernaniko Mendiriz Mendi Elkarteak Mendizale Astea lehenengo aldiz egin zuenetik. Aurtengoa ere hastear da eta urteroko legez, ekintza eta ekitaldiz beteta dator aurtengoa ere; haurrentzako eguna, argazki lehiaketa eta hainbat proiekzio ikusteko beta izango da besteak beste.
Ostirala, haurrak
protagonista
Urtero haurrekin ospakizun txiki bat egiten dute, aurreko urteetan magoak eta ipuin kontalariak izan dituzte esaterako. Aurtengoan, gauza berezi bat egin nahi izan dute eta mendira joaten diren 30 gaztetxoek, urte osoan zehar egin dituzten irteerekin argazki bilduma bat osatu dute, eta hori da haurren egunean 18:00etatik aurrera ikusteko aukera izango dena. Urtero parte hartzaileek domina jasotzen dute eta aurtengoan elkartea sortu zenean irteerak antolatzen zituzten pertsonak izango dira dominak banatzeko arduradunak.
Aurreko urteetan Mendizale Asteko azken egunean argazki lehiaketa egiten zen eta aurten bai umeen jaia eta baita XXXII. argazki lehiaketa ere egun berean egingo dira, bata bestearen atzetik. 19:30etan hasiko da argazkien erakusketa eta 26 pertsona inguruk parte hartu dute. Bertan eta astean zehar egiten diren zozketatan lortu daitezkeen opariak urtero laguntzeko prest azaltzen diren herriko hainbat dendatako kolaborazioei esker banatzen direla azpimarratu dute Mendizale Asteko antolatzaileek.
Astelehenetik asteazkenera proiekzioak ikusgai
Hiru proiekzio eskainiko dira Biteri Kultur Etxean: Dolpo, biziaren muturrean; Muturreko eskia Pirineoetan eta Madagaskar: lur gorriko irla. Lehenengoa, Jose Ramon Agirre `Marron´-ek Dolpo, biziaren muturrean izendatu duen proiekzioa eskainiko da, honek zenbaitetan parte hartu eta eskaini izan ditu proiekzioak Mendizale Astean. Mendiriz Mendiko kideen hitzetan pena merezi izaten du horrelako proiekzioak ikustea, muntaia onak egiten ditu eta kalitatea izugarria izaten omen da.
Beste biak berriak dira; Fidel Mendiak, Muturreko eskia Pirineoetan lana eskainiko du eta Iñaki Caperochipik aldiz, Madagaskar: lur gorriko irla. Urte hasieran ekiten diote hiru proiekzioak lotzeari eta beti saiatzen dira urtero gauza ezberdinak lortzen. Ezagutzen dituztenak eta ezezagunak direnak uztartzeari ematen diote garrantzia eta baita material oso ezberdinez osatutako programa eskaintzeari ere.
Osteguna, Hernaniarron txanda
Kasu honetan Hernaniarrek eskaintzen dituzte proiekzioak eta hori lotzea askotan kosta egiten dela diote: `Herrian jende asko bidaiatzen aritzen da, baina gerora proiekzioak egitera animatzea zaila izaten da´. Askotan jende berarengana jo behar izaten dute, materiala badutela badakitenengana eta herritarrak animatzea gustatuko litzaieke antolatzaileei. Aurten Iñaki Sanzen Hernani: mendia eta natura izeneko erreportajea izango da ikugai eta Anjel Beldaren Picos de Europa.
Igandean, denak mendira
Mendi Asteari amaiera emateko beti irteera bat egiten dute, aitzaki horrekin urtean zehar antolatzen den bazkari bakarra egiteko parada izaten dute. Jende asko joaten da bertara, bazkide guztiei dago zuzenduta eta antolatzaileek diote urtetik urtera ikusten dela jendea gustura joaten dela bertara.
Horretaz aparte, Mendizale Astea amaitu bezain laster hiru egunetan egiteko ikastaro bat dago antolatuta urteroko moduan. Aurtengoan, aurreko urtean bezalaxe, arrakasta handia duen GPS ikastaroa eskainiko dute. Oinarrizko ikastaroa
izango da, GPSa erabiltzen ez dakien jendearentzako hain justu. Bazkideentzako bideratutako ikastaroa
izango da, plaza mugatuak direlako eta bazkideei aukera hori eskaini nahi dietelako.