Hemen jaiotako herritarren eta beste lurraldeetatik etorritakoen artean, istorio ugari daude Gipuzkoan, babes eta elkartasunean oinarritzen direnak. Baita Hernanin ere. Istorio horiek posible egin dituzten herritarrak omenduko ditu gaur, 17:00etatik aurrera, SOS Arrazakeriak. Gipuzkoa Solidarioa. Bizilagunak izeneko ekitaldia Donostian izango da, Kursaalean.
Halako omenaldia egiten dela, bigarren urtea da. Hernaniko AMHER-SOS Arrazakeria taldeak azaldu duenez, «halako istorio eta harremanek merezi dute ezagutzera ematea, jendeak ikusi dezan, konbibentzia eta integrazioak aberatsago egiten gaituztela eta gizarte atseginagoa eta humanoagoa egiten dutela».
Lau istorio, 10 hernaniar
Omenduen artean, 10 hernaniar izango dira. Alde batetik, Lourdes Tranche eta Helen Edelokun (jatorriz, nigeriarra) omenduko dituzte. Tranche emagina (matrona) da Lasarteko anbulatorioan eta Edelokun ezagutu zuen haurdun zegoela. Tranchek ingelesa irakasteko eskatu zion Edelokuni eta sekulako harremana lortu dute denborarekin.
Bestetik, Zuriñe Alvarez, Oihana Leonet, Itxaso Etxabe, Nerea Sanchiz eta Julie Aguirre (jatorriz, kolonbiarra) omenduko dituzte, Aguirrek, Hernaniko kuadrilan lortu duen erabateko integrazioa dela eta.
Azkenik, beste bi istorio daude, biak etxea eta familiari lotuta. Marisa Garciak, Tilk Gurung (jatorriz, Nepalgoa) ezagutu zuen SOS Arrazakeriak antolatutako tailer batzuetan eta Gurung etxean hartu zuen. Ordutik, ama-seme arteko harremana dute eta Garciak bi biloba ere baditu, egun. Maria Jesus Elosegik, berriz, pertsona askori eman izan die babesa eta egun, Rachid-ekin (jatorriz, marokoarra) du harremana.