Ereñotzuko Udazken Kulturala aurrera doa eta bihar, ezti probaketa gidatua izango da, Julian Urkiolaren eskutik. Arratsaldeko 19:00etan hasiko da kultur etxean.
Urkiolak Kronikari aurreratu dionez, 3 ezti motarekin egingo du probaketa: akazia, txillarra eta gaztainondoaren eztiarekin. Partaide bakoitzari, poto txiki bana emango dio probatzeko, ezti mota bakoitzetik. Mota bakoitza banaka banaka aztertzen joango dira: ezaugarriak, usaina, kolorea, zaporea, propietateak, gogortasuna... Denen artean eztia gehiago ezagutzeko asmoz.
Urkiolak, hiru ezti mota horiek aukeratu ditu, «hemen horiek dauzkagulako».
Bertso afaria larunbatean eta antzerkia igandean
Larunbatean bertso afaria izango da 20:30etan Ur Mia elkartean, 25 euroan. Beñat Gaztelumendik eta Julio Sotok kantatuko dute. Txartelak erosteko: olakae@gmail.com edo 625 703 656. Igandean, Ametsen fabrika ipuin antzeztua izango da, 11:30etan, kultur etxean.