Hernaniarren memorian dago 1936ko gerra zibila. Gerra haren pasarterik beltzenetakoa Hernanik bizitu zuen; 1936ko urrian, Hernanin 200 lagun inguru fusilatu zituzten frankistek; hilerriko paretan asko, eta Galarretan beste asko (hernaniarrak, 13). Ondarretako kartzelatik atera, eta hil zituzten gehienak, eta ondoren Hernaniko hilerrian lurperatu, karroan ekarrita. Haien oroimenez jarritako plaka batek horrela dio: Arerio maltzurrak zuek bazterrean utzi arren, Euzko Gogoan toki berezia daukazue.
Hainbat urte eta gero,
familiartekoen bila
75 urte pasa dira ordutik, eta herritarren memorian leku berezia dauka garai gogor hark, eta ondorengoek. Asko dira euren familiartekoen arrastorik ez dutenak oraindik, eta ikertzeko eskatzen ari direnak: non desagertu eta nora eraman zituzten.
Hernanin fusilatutako 200 pertsona haiek ez dira agertu. Hernaniko Udalaren eskariz, Aranzadik hilerriko hobia zabaldu zuen, 2003an, baina kripta hutsik aurkitu zuten, beste hainbat lekutan bezala. Ez dago garbi non dauden gorputzak, baina aditu batzuk eta testiguek diotenez, 1960an atera, eta beste norabait eramanak dira, arrastoak ezkutatu asmoz-edo.
5.500 fusilatu inguru,
Hego Euskal Herrian
Datuak jakiten ez da erraza, baina Eusko Jaurlaritzak orain gutxi ateratako datuek diotenez, 5.500 lagun inguru fusilatu zituzten 1936an, Hego Euskal Herrian; horietatik 1.100, Gipuzkoan. Nafarroan, 3.000 ziren fusilatuak. Gipuzkoan, 21 hilobi aurkitu dituzte. Informazio gehiago: www.jusap.ejgv.euskadi.net/r47-contmh2/eu.
Aitzol, Hernaniko hilerrian hil zuten, urriaren 17an
Jose Ariztimuño, Aitzol, apaiz euskaltzalea, tolosarra, 1936ko urrian, 17an, fusilatu zuten frankistek, Hernanin, beste askorekin batera. Galerna barkuan ihesean zihoazela harrapatu zituzten (barkua 250.000 pezetaren truke saldu zuten, pertsona eta guzti). Haietako asko Hernaniko hilerriko paretan fusilatu zituzten; tartean, Aitzol. Orduz geroztik, Aitzol bihurtu da Hernanin fusilatutakoen sinbolo.Fusilatutako 13 hernaniar (*)
- Jose Adarraga - Apaiza
- Julian Alzelai - 23 urte
- Jose Amilibia Saldias - 29 urte
- Candido Aranburu Txintxurreta - Komunista - Rosa de Luxenburgo batailoiko burua
- Angel Arbiza - 37 urte
- Felisa Goñi Biurrun
- Fernando Isutia Maiz - Regimiento de la Victoria 28 zk gudaria
- Angel Jimenez - UGT
- Jose Manrique - 38 urte
- Alejandro Mendikute - Apaiza
- Angel Tormes Asin - EAJ
- Policarpo Usarraga - 49 urte
- Pascual Zabala
Gehiago izan daitezke.
Albiste gehiago:
- «Egia jakin nahi dugu justizia egiteko, gertatutakoa erreparatzeko, eta berriro ez gertatzeko» (2010/10/16)
- Frankismoko egun beltz haiek... (2010/10/18)
- Felix Goia omendu zuten goiatarrek,
1936an frankistek fusilatua (2011/10/25)