herri arabiarrak notizi dira azken hilabeteetan. Sekulako iraultzak bizitzen ari dira, aldaketa haundiak. Ez da erraza hemendik, ordea, han zer gertatzen den jakitea eta zergatik. Irakeko kazetari batek hitz egingo du gaur Biterin, 19:30etan, horri guztiari buruz. Yaroub Akram Ali irakiarra da. Gaur egun Noruegan bizi da eta kazetari lanak egiten ditu. Irakeko okupazioari buruz idazten du batik bat, baina baita mundu arabiarreko kasuei buruz ere. Estatu Batuetako gobernua kritikatzen du, eta baita mendebaldeko gobernuak ere, mundu arabiarrean egin dutenagatik. Komunikabideen gezurrak, Irakeko okupazioa, Palestinako egoera... eta batik bat, herri arabiarretako egoera; horri buruz ariko da gaur, Biteri kultur etxean.
GKE-ONG batekin lanean, eta El Mundo egunkarian
Irak okupatu zutenean, Akarm Ali GKE-ONG batean lanean ari zen Iraken, Palestinako errefuxiatuei giza-laguntza ematen. GKE hori Espainiakoa da: MPDL. Horrez gain, kazetari lanak ere egiten zituen, El Mundo egunkarirako. Inongo arrazoirik gabe atxilotu zutela dio; batez ere, errefuxiatu palestinarrekin lanean ari zelako, eta hori, susmagarri izateko arrazoi nahikoa izaki.
Atxilotutako egunak
Yaroub Akram Ali atxilotu egin zuten 2005ean, soldadu estatubatuarrek. Akram Alik idatzi egin zuen, atxilotutako egunen kronika. Hemen zati bat: «...ez zegoen ordu jakin bat, atxilotuak interrogatzeko. Batzuetan egunez, besteetan gauez. Interrogatorio-gela ez zegoen gure zeldatik urruti. Poliziak atea irekitzen zuenean, denok ixiltzen ginen, elkarri begira, ea zeinen txanda ote zen. Izena esan eta pertsona hori eramaten zutenean, mutu. Minutu batzuk barru entzuten ziren garrasiak, minak eragindako orruak. Ordubetera ekartzen zuten gizarajoa, txikituta. Lo egiteko hauspez egin behar izaten zuten, minez, ezin baitzuten buruz gora etzan. Etengabea zen rituala, batzuetan egunez, besteetan gauez...».