Zer ari da gertatzen arabiar lurraldeetan? Zergatik ari dira iraultza ezberdinak ematen bata bestearen atzetik? Bi galdera horiek eta askoz gehiago azaldu eta erantzungo dituzte Taha Azeez Samir eta Yaarub Akram Ali hizlariek. Arabiarrak eta Islama: mugimendu sozialak eta giza eskubideak gaitzat hartuta, jardunaldiak antolatu dituzte Hernaniko Kooperazio Taldeak, Udal Lankidetza Arloak eta Kontrakantxa gaztetxeak. Bi hizlariak irakiarrak dira, nahiz eta egun handik urruti bizi diren. Taha Azeez Samir Sirian erbesteratutako irakiarra da. Preso politiko ohia da eta borroka eta Aldaketa Fronteko kidea da. Yaarub Akram Ali hizlaria berriz, kazetari irakiarra da, eta Novergian bizi da errefuxiatu politiko gisa. Yaarub Akarm Ali ere preso politiko ohia da.
Egoera bizitu
dutenen eskutik
jakitearen garrantzia
Antolatzaileen esanetan, arabiar herrialdeetan ematen ari diren iraultzen inguruko informazioa berri agentzia haundietatik iristen da. Beraz, jardunaldi hauekin lortu nahi dutena da egoera gertutik bizitu duten bi pertsonen eskutik jakitea zer gertatu den: «egoera gertutik bizi duten bi pertsonek azalduko digute zer ari den gertatzen eta zergatik. Gai horien inguruan izan ditzakegun zalantzak beraiekin konpartitzeko aukera izango dugu, eta etorkizunera begira, elkar ulertzeko eta lankidetzan aritzeko bidea egingo dugu». Hori horrela, gaur eguerdian, 12:30etan, harrera egingo diete bi hizlariei Udalean.
Errepresio politikotik
iraultzara, pausoz pauso
Jardunaldiak hiru hitzaldiz daude osatuta, eta bertan, pausoz pauso azalduko dute arabiar herrialdeetan gertatu dena gaur egungo egoerara iritsi arte. Aurreneko hitzaldia gaur emango dute Taha Azeez Samir eta Yaarub Akram Ali hizlariek Kontrakantxa gaztetxean. Biak Iraken jasaten ari diren errepresio politikoaren inguruan ariko dira, 19: 30etan. Biharko hitzaldia Irakeko okupazioa eta honen ondorioen ingurukoa izango da, eta Taha Azeez Samirrek emango du, bakarka. 19:30etan izango da, Biterin. Azkenik, osteguneko hitzaldia iraultza arabiarren ingurukoa izango da. Yaarub Akram Alik emango du eta iraultzen zergatia eta noranzko bidea azalduko ditu. Biterin izango da, 19:30etan.