sarrera hotzak eta beroak, arrautza babarrun zurien zoparekin, espinakak eta urdaiazpikoa, txerri papoa ezkai (tomillo) eta limoi infusioarekin, sagar-menbrilloa merenge eta bainillarekin... Bi aperitibo eta lau platera, edaria barne. Prezioa: 45 euro. Goi mailako sukaldaritza erdi prezioan, horixe da Hernaniko Fagollaga Jatetxeak eskainiko duena gaurtik hasita, ostegun gauero. Sukalday ekimenaren barruan izango da hori. Gipuzkoako 10 jatetxek jarri dute ekimena martxan, Sukatalde Gazte Sukaldarien elkartea osatzen duten jatetxeek, hain zuzen. Ixak Salaberria Fagollaga Jatetxeko sukaldariak Kronikari azaldu dionez, ekimenak bi helburu ditu: «Alde batetik, gure sukaldaritza herritarrengana gerturatu nahi dugu, kalitatezko eta garaiko produktuak prezio eskuragarrian jarriz. Azken platerak eta gauza ezberdinak probatzeko aukera izatea nahi dugu. Eta bestetik, ostegunak berriro pizteko asmotan jarri dugu ekimena martxan. Lehen ostegunetan mugimendua izaten zen, baina azken bi urteetan asko jaitsi da». Salaberriak ekimena polita dela uste du eta jendeari dei egiten dio animatzeko eta probatzeko. Fagollagan, hilabetero aldatuko dute menua.
Bezero finei, saria
Fagollagaz gain, honako 9 jatetxe hauek hartuko dute parte ekimenean: Xarma, Mirador de Ulia, A fuego negro, Agorregi, Branka, Bera Bera eta Kokotxa Donostian, Fronton Tolosan, eta Hamalau Arrasaten. Aukeran jarriko dituzten menuen prezioak 25 eta 50 euro artekoak izango dira.
Horrez gain, bezero finei edo leialei saria emango diete. Hau da, Gipuzkoako 10 jatetxe horietan egon den bezeroak, sari bat jasoko du. Jatetxe bakoitzean, seilu bat jarriko diote. Saria ez dute zehaztu.