Plenoa izan zen astearte arratsaldean Udalean, eta bertan, hamazazpi puntu bozkatu zituen Bildu alderdiak (oposizioak plenoa utzi zuen). Bertan bozkatu ziren puntuetatik bi ondorengoak izan ziren: Euskararen erabilera euskal instituzioetan izeneko mozioa, eta A. Amonarraizek egindako proposamena AAren inguruko kontu ikuskaritza kontratatzeko.
«Herritarrei harremana
euskaraz bideratzeko
aukera ziurtatu behar da»
Euskararen erabilera euskal instituzioetan mozioa Bilduren aldeko botoekin onartu zen. Mozioan, Bilduk dio lanean hasi eta berehala hainbat tramitazio egin behar izan zituztela Ertzaintzarekin, eta guztietan gaztelaniaz hitz egin behar izan zutela: «lau elkarrizketa izan ditugu, eta lauetan eskatu zaigu hizkuntza aldatu eta gaztelaniaz hitz egiteko. Guk euskaraz egin nahi genuela esanda, ezinezkoa izan da kasu guztietan».
Mozioan azaldu dute, elkarrizketa hauek Hernaniko komisaldegiarekin izan zirela, eta EAEn euskara hizkuntza ofiziala izanda, administrazio publikoak euskararen erabilera ziurtatu behar duela. Ondorioz, mozioan hiru puntu eskatzen dituzte: «1, euskaldunon hizkuntza eskubideak errespetatzea; 2, beste edozein administrazio publikoko erakundeei bitartekoak prestatzea hizkuntza eskubideak errealak izan daitezen eta egin beharreko moldaketak eta egokitzapenak egitea; eta 3, beste edozein administrazio publikoko erakundeei hizkuntza eskubideen aurkako eraso oro salatzea».
AAren inguruko kontu ikuskaritza
Plenoan baita ere, EAJko Amonarraizek aurkeztutako kontu ikuskaritza proposamena deuseztatzea erabaki zen. Proposamenean, Amonarraizek eskatzen du, besteak beste, Ateaz Ateko bilketari buruzko kontu ikuskaritza kontratatzea, eta dio, hori eskatzeko arrazoietako bat informe tekniko batzuen existentzia dela: «informe tekniko batzuk badaude adjudikazio prozedurak legea jarraituz egin ez direla erakusten dutenak. Horrez gain, Amonarraizek dio AAren koste erreala zein den ere jakin nahi duela eta horregatik egin duela auditoriaren proposamena».
Bilduk ezezko botoa arrazoitzean esan zuen, eskatzen den azterketa hori beraiek ez zeuden garai batekoa dela, eta ez dela beraien lana aurreko legegintzaldiko fiskalitateak aztertzea.