Hernanik gaur ekingo dio denboraldiari, lehenengo mailan

Hernani Teklan Laser taldeak, hau da, senior taldeak gaur hasiko du denboraldia. Gipuz­koako goi mailan ekingo dio denboraldiari, iaz mailaz igo baitzen. Eta aurtengo helburua, mailari eustea izango da, Jon Es­naola saskibaloi tal­deko arduradun, jokalari ohi eta jubenilen entrenatzaileak azaldutakoaren arabera. «Hel­burua izan­go da man­ten­tzea. Erdial­dean gera­tzea lortuko bagenu, hobeto, eta lehenengo lauen artean geratuko bagina, kristoren denboraldia izango litzateke. Izan ere, lehenengo lau taldeek Finalfour dei­turikoa jokatzen dute». Dena dela, hori, urte pare batera gehiago ikusten du Esnaolak.
Taldeak entrenatzaile be­rria ere izango du aurten. Eta ez no­lanahikoa: Ricardo Ga­rre. Ga­rre, 80. hamarkadan Hernaniko taldearen bultza­tzaile eta jokalari izandakoa da eta entrenatzaile gisa esperien­tzia haundia due­na: As­katuak-en ibilia, Eason, Do­nostin... Taldea 12 jokalarik osa­tzen dute eta hernaniarrak dira gehienak. 9 dira bertakoak, 1 Astigarragakoa eta 2 donostiarrak. Azken bi jokalari horiek aurten etorri dira Hernanira, gainerakoak iazko berak dira.

Lehenengo mailara buelta
Seniorren taldea lehenengo mai­lan dagoela ez da aurreneko ur­tea. Aurreko denboraldian bigarren mailan aritu baziren ere, ho­rren aurreko hiru urteetan lehe­nen­go mailan ibili ziren. Lehe­nengo urtea oso polita izan zela gogoratzen du Jon Esnao­lak, ga­rai hartan jokalarietako bat izan zenak, «baina hurrengo bi ur­teetan, taldetik kanpoko hainbat arazo tarteko, taldea desegin egin zen eta bigarren mailara jaitsi».
Orain, Taldea oso indar­tsu ikus­ten du Esnaolak eta ilusio haundiarekin. «Jokala­riek go­za­tu egingo dute aurten eta ikusleek ere bai». Hori ziurta­tzeko auke­ra izango da gaur, 16:15e­tan, Hernaniko kiroldegian. In­txaurrondoko Inter taldea izango du aurrez aurre.

Etorkizuna, bai
Hernaniko saskibaloi elkarteak kategoria bakoitzean 2 maila izango ditu aurten: infantiletan, kadeteetan eta jubeniletan. Gaz­teak jokatzeko gogoz egoteaz gain, maila oneko taldeak daudela dio Esnaolak eta alde horretatik, etorkizuna badagoela Her­na­niko saskibaloian. «Ara­zoa, ordea, entrenatzaile eta baliabide falta da. Jokalari diren batzuk entrenatzaile gisa hasten dira, baina urte bakoi­tzeko bat atera­tzea litzateke one­na. Kantxak ere falta dira. Talde gehiago izateko aukerarik ez dago. Kiroldegia berritu eta lekua gehiago aprobetxatu beharko litzateke. Pistak hobeto antolatu. Toki asko dago, bai­na gaizki aprobetxatuta», dio.

Jubenil eta kadeteek Euskadiko Txapelketan
sartzea helburu
2. urteko jubenilek Euskadiko Txapelketan sartzea dute helburu, hau da, Ligan, Gipuz­koa­ko lehenengo bi taldeen artean geratzea. Gaur dute partidua Krafft Atletico Sn Sn-en aurka, 12:00etan, Atleticon. Kadeteen 2. urteko taldearen helburua ere bera da. Horiek etxean jokatuko dute, bihar 12:00etan, Goierriren aurka. 1go urteko taldeak, berriz, hu­rrengo urterako prestatzen ari dira. Eta infantilak, urria bukaeran hasiko dute denboraldia.
Neskei dagokienean, mu­ti­len kasuan inguruko herrietako gazteak Hernanira etor­tzen diren bezala, Hernaniko neskek Astigarragako taldean jokatzen dute.