Umore Ona Eguna izango da gaur Goizuetan. Bertan, Umore Ona elkarteak, bere lau atal edo taldeei afari bat antolatzen die urtero, eta egunean zehar, lau taldeek herria girotzen dute bakoitzari dagokion ekintzekin. Lau taldeak dira: pelota eskola, futbito taldea, dantza taldea eta korua. Hori horrela, arratsaldeko 16:30etan hasita, umeen pelota partiduak jokatuko dira eskolako frontoian. Ondoren, futbol partidua izango da. Futbito taldeak herritarren aurka jokatuko du. Eta futbol partiduaren ostean, kalean barrena kalejiran ibiliko dira dantza taldearekin eta koruarekin. Taberna atarietan geldialdiak egin eta dantzatu eta abestu egingo dute. Eguna amaitzeko, Umore Ona elkarteak prestatutako afari ederra zain izango dute, 22:00etan.
Kizki Eguna, gaur zortzi
Urriaren 1ean, datorren larunbatean, Kizki Eguna izango da Goizuetan, Oiartzungo desafioari erantzunez. Orain dela bi urte Astigarragan antolatu zen Kizki Eguna eta 311 lagun aritu ziren sagar biltzen. Iaz Oiartzunek marka hobetu zuen 354 lagunekin eta aurten, goizuetarrek gutxienez 355 lagun biltzea dute helburu. Hori horrela, herritarrei bakarrik ez, kanpotarrei ere animatzeko dei egiten diete. Kizkiak salgai daude 3 euroan. Bestalde, herri bazkaria izango da eta txartelak salgai daude 16 euroan, Amaia kafetegian. Txartela eta kizkia erosiz gero, 18 euro.